Category Archives: Jesus

የህይወት ሚስጥር

conscious.jpgህይወት ሚስጥር ነው፡፡ ህይወትን የሰራውና የሰጠን እግዚአብሄር ነው፡፡ እግዚአብሄር ደግሞ ማስተዋሉ አይመረመርም፡፡

ህይወት በአንድ ቃል እንዲህ ነው ተብሎ አይተረጎምም፡፡

ከየት መጣሁ ወደየት እሄዳለሁ ለምን በዚህ ምድር ላይ አለሁ የሚሉት ጥያቄዎች ትክክለኛውን መልስ ማግኘት የህይወት ጥራታችንን ይወስነዋል፡፡ በዚህ ምድር የመኖር አላማዬ ምንድነው የሚለውን ማወቅ ይህንን የህይወት ስጦታ በደስታ ተቀብለን ለታለመለት አላማ እንድናውለው ያደርገናል፡፡

የህይወትን ሚስጥር ማንም ፈላስፋ በትክክል ሊያስረዳን አይችልም፡፡ የህይወት ሚስጥር የምናገኘው የህይወትን ስጦታ ከሰጠን ከእግዚአብሄር ብቻ ነው፡፡

የህይወትን ሚስጥር የምንረዳው ህይወትን ከፈጠረው ከእግዚአብሄር ቃል ብቻ ነው፡፡ ብዙ ሰዎች ስለ ህይወት ብዙ ብለዋል፡፡ ነገር ግን የህይወትን ሚስጥር በትክክል የምንረዳው ከመፅሃፍ ቅዱስ ብቻ ነው፡፡

መፅሃፍ ቅዱስ ስለህይወት እንዲህ ይላል፡፡

ሰው ህይወትን ለመረዳት ከፈለገ ኢየሱስን መረዳት አለበት፡፡ ካለ ኢየሱስ ህይወትን ለመረዳት መሞከር ከንቱ ሙከራ ነው፡፡ የህይወት ትርጉም ኢየሱስ ነው፡፡ ኢየሱስ ህይወት ነው፡፡

ኢየሱስም፦ እኔ መንገድና እውነት ሕይወትም ነኝ፤ በእኔ በቀር ወደ አብ የሚመጣ የለም። የዮሐንስ ወንጌል 14፡6

ኢየሱስ የህይወት እንጀራ ነው፡፡ ሰው በህይወት አለመራብ ከፈለገ ኢየሱስን መገናኘት አለበት፡፡ ሰው በህይወት መርካት ከፈለገ ከኢየሱስ ጋረ መጣበቅ አለበት፡፡ ሰው ህይወትን መኖር ከፈለገ ኢየሱስን ማግኘት አለበት፡፡ ሰው ህይወትን መለማመድ ከፈለገ በኢየሱስ መኖርን መለማመድ አለበት፡፡  ሰው በህይወት መኖር ከፈለገ በኢየሱስ መኖር አለበት፡፡

ሕያው አብ እንደ ላከኝ እኔም ከአብ የተነሣ ሕያው እንደምሆን፥ እንዲሁ የሚበላኝ ደግሞ ከእኔ የተነሣ ሕያው ይሆናል። የዮሐንስ ወንጌል 6፡57

እውነተኛን ህይወት የምናጣጥመው በኢየሱስ ነው፡፡ እውነተኛን ህይወት ለማጣጣም ወደ ኢየሱስ መምጣት ግዴታ ነው፡፡

እናንተ በመጻሕፍት የዘላለም ሕይወት እንዳላችሁ ይመስላችኋልና እነርሱን ትመረምራላችሁ፤ እነርሱም ስለ እኔ የሚመሰክሩ ናቸው፤ ነገር ግን ሕይወት እንዲሆንላችሁ ወደ እኔ ልትመጡ አትወዱም። የዮሐንስ ወንጌል 5፡39-40

እውነተኛ የህይወት ርካታ የሚገኘው ጌታ ኢየሱስን በሚገባ በመከተል ብቻ ነው፡፡

ኢየሱስም መልሶ፦ ከዚህ ውኃ የሚጠጣ ሁሉ እንደ ገና ይጠማል፤ እኔ ከምሰጠው ውኃ የሚጠጣ ሁሉ ግን ለዘላለም አይጠማም፥ እኔ የምሰጠው ውኃ በእርሱ ውስጥ ለዘላለም ሕይወት የሚፈልቅ የውኃ ምንጭ ይሆናል እንጂ አላት። የዮሐንስ ወንጌል 4፡13-14

ኢየሱስን ስንከተል የህይወትንም መንገድ እንከተላለን፡፡ ኢየሱስን ስናየው ህይወትን እናያለን፡፡

በልጁ የሚያምን የዘላለም ሕይወት አለው፤ በልጁ የማያምን ግን የእግዚአብሔር ቍጣ በእርሱ ላይ ይኖራል እንጂ ሕይወትን አያይም። የዮሐንስ ወንጌል 3፡36

በኢየሱስ ስንኖር በህይወት እንኖራለን፡፡ ከኢየሱስ ውጭ ስንኖር ከህይወት ውጭ እንኖራለን፡፡

በእኔ ኑሩ እኔም በእናንተ። ቅርንጫፍ በወይኑ ግንድ ባይኖር ከራሱ ፍሬ ሊያፈራ እንዳይቻለው፥ እንዲሁ እናንተ ደግሞ በእኔ ባትኖሩ አትችሉም። እኔ የወይን ግንድ ነኝ እናንተም ቅርንጫፎች ናችሁ። ያለ እኔ ምንም ልታደርጉ አትችሉምና በእኔ የሚኖር እኔም በእርሱ፥ እርሱ ብዙ ፍሬ ያፈራል። የዮሐንስ ወንጌል 15፡4-5

በኢየሱስ ስንኖር ለህይወት ሃይል እናገኛለን፡፡ በኢየሱስ ካልኖርን ለህይወት ሃይል አናገኝም፡፡ በኢየሱስ ካልኖርን በሃይል አንኖርም፡፡

በሃይማኖት ብትኖሩ ራሳችሁን መርምሩ፤ ራሳችሁን ፈትኑ፤ ወይስ ምናልባት የማትበቁ ባትሆኑ፥ ኢየሱስ ክርስቶስ በእናንተ ውስጥ እንዳለ ስለ እናንተ አታውቁምን? 2ኛ ወደ ቆሮንቶስ ሰዎች 13፡5

የህይወት እውነተኛ ትርጉም የሚገኘው በኢየሱስ ውስጥ ነው፡፡

አቢይ ዋቁማ ዲንሳ Abiy Wakuma Dinsa

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ብልፅግና #መደሰት #ስኬት #ህይወት #ስጦታ #በረከት #ስኬት #እረኛእግዚአብሄር #ስምረት #መሰረታዊፍላጎት #ሁሉየእናንተነውና #ቤተክርስትያን #አማርኛ #ስብከት #መዳን #የተትረፈረፈህይወት #መፅሃፍቅዱስ #ሰላም #አቢይ #አቢይዋቁማ #አቢይዋቁማዲንሳ #መርካት #ደስታ #ማስተዳደር #እረፍት

Advertisements

የክርስቶስም ሙላቱ ልክ እስክንደርስ

church leader.jpgሁላችን የእግዚአብሔርን ልጅ በማመንና በማወቅ ወደሚገኝ አንድነት፥ ሙሉ ሰውም ወደ መሆን፥ የክርስቶስም ሙላቱ ወደሚሆን ወደ ሙላቱ ልክ እስክንደርስ ድረስ፥ ቅዱሳን አገልግሎትን ለመሥራትና ለክርስቶስ አካል ሕንጻ ፍጹማን ይሆኑ ዘንድ። ኤፌሶን 4፡12-13

የክርስትና ጉዞ የእድገት ጉዞ ነው፡፡ የክርስትና ጉዞ መነሻ ያለው መድረሻም ያለው ጉዞ ነው፡፡

የክርስትና ጉዞ ሲጀመር የሚታወቅ ግቡም የሚታወቅ ጉዞ ነው፡፡ ክርስትና መነሻውም መድረሻውም የማይታወቅ የግምት ረቂቅ ጉዞ አይደለም፡፡ ክርስትና መነሻውም መድረሻውም የሚገመት ባዶ ሃይማኖት አይደለም፡፡ ክርስትና መነሻውም መድረሻውም የማይታወቅ የወግና የስርአት ብዛት አይደለም፡፡

ክርስትና የሚጀመረው በንስሃ ከአሮጌ ኑሮ ፍጹም ወደኋላ በመመለስ ነው፡፡ ክርስትና የሚጀመረው ዳግም ከመወለድ ነው፡፡ ዳግም የተወለደ ሰው ደግሞ ያድጋል፡፡

የክርስትና እድገት ወግና ስርአት መፈፀም አይደለም፡፡ የክርስትና እድገት የውጫዊ ስርአትን መጠበቅ አይደለም፡፡

ትሕትናንና የመላእክትን አምልኮ እየወደደ፥ ባላየውም ያለ ፈቃድ እየገባ፥ በሥጋዊም አእምሮ በከንቱ እየታበየ ማንም አይፍረድባችሁ። እንደዚህ ያለ ሰው ራስ ወደሚሆነው አይጠጋም፥ ከእርሱም አካል ሁሉ በጅማትና በማሰሪያ ምግብን እየተቀበለ እየተጋጠመም፥ እግዚአብሔር በሚሰጠው ማደግ ያድጋል። ወደ ቆላስይስ ሰዎች 2፡18-19

የክርስትና እድገት ጣራው የክርስቶስ ሙላት ልክ ነው፡፡ የክርስትና መጨረሻው ክርስቶስን መምሰል ነው፡፡ የክርስትና መጨረሻው የክርስቶስ ሙላት ልክ ነው፡፡ የክርስትና ግቡ ክርስቶስን ሙሉ ለሙሉ መከተልና መምሰል ነው፡፡

ሁላችን የእግዚአብሔርን ልጅ በማመንና በማወቅ ወደሚገኝ አንድነት፥ ሙሉ ሰውም ወደ መሆን፥ የክርስቶስም ሙላቱ ወደሚሆን ወደ ሙላቱ ልክ እስክንደርስ ድረስ፥ ቅዱሳን አገልግሎትን ለመሥራትና ለክርስቶስ አካል ሕንጻ ፍጹማን ይሆኑ ዘንድ። ወደ ኤፌሶን ሰዎች 4፡12-13

አቢይ ዋቁማ ዲንሳ Abiy Wakuma Dinsa

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እግዚአብሔር #ጌታ #መከተል #ክርስቶስእስኪሳል #መምሰል #ክርስቶስንመምሰል #ቃል #ተማሪ #መንፈስቅዱስ #ቃሉንመስማት #ደቀመዝሙር #ቤተክርስትያን #አማርኛ #ስብከት #ነፍስንመካድ #መፅሃፍቅዱስ #ተከታይ #ህይወት #ፌስቡክ #አቢይዋቁማ #አቢይዋቁማዲንሳ

በዋጋ ተገዝታችኋልና ለራሳችሁ አይደላችሁም

the cross.jpgበዋጋ ተገዝታችኋልና ለራሳችሁ አይደላችሁም፤ 1ኛ ቆሮንቶስ 6፡19-20

በሰው ህይወት የባለቤትነት ጥያቄ ሲመለስ ብዙ ጥያቄዎች ይመለሳሉ፡፡ የባለቤትነት ጥያቄ ሲመለስ የተለያዩ የመብት ጥያቄዎች  ይመለሳሉ፡፡

አንድ ነገር የማን ነው የሚለው ጥያቄ ሲመለስ ማን መብት አለው የሚለውም ጠያቄ አብሮ ይመለሳል፡፡ አንድ ነገር ባለቤቱ ማን አንደሆነ ጥርት ያለ ነገር ከሌለ በነገሩ ላይ ማን ምን መብት አለው የሚለው ጥያቄ ሊመለስ አይችልም፡፡

እግዚአብሄር እኛን የፈጠረን ለክብሩ ነው፡፡ እግዚአብሄር እኛን የፈጠረን ለራሱ ነው፡፡ እግዚአብሄር የፈጠረን ለእኛ ለራሳችን አይደለም፡፡ ይህን እውነት ካልተረዳን ሌላ ምንም እውነት ልንረዳ አንችልም፡፡ በዚህ ካልተግባባን በሌላ በምንም ልንግባባ አንችልም፡፡ እኛ ፈጣሪዎች አይደለንም፡፡ እኛ የእግዚአብሄር የፈጠረን ፍጡሮች ነን፡፡ የህይወታችን ባለቤት እግዚአብሄር ብቻ ነው፡፡

እርሱ አምላካችን ነውና፥ እኛ የማሰማርያው ሕዝብ የእጁም በጎች ነንና። መዝሙር 95፡7

እግዚአብሄር ለክብሩ ፈጥሮናል፡፡ እኛ የእርሱ ነን፡፡ እኛ የራሳችን አይደለንም፡፡

በስሜ የተጠራውን ለክብሬም የፈጠርሁትን፥ የሠራሁትንና ያደረግሁትን ሁሉ አምጣ እለዋለሁ። ኢሳያስ 43፡6-7

እግዚአብሄር በእኛ ላይ ሙሉ ባለመብት ነው፡፡ እኛ በራሳችን ላይ መብት የለንም፡፡

እንደ ሸክላ ሠሪ ጭቃ የምትቈጠሩ አይደላችሁምን? በውኑ ሥራ ሠሪውን፦ አልሠራኸኝም ይለዋልን? ወይስ የተደረገው አድራጊውን፦ አታስተውልም ይለዋልን? ኢሳያስ 29፡16

ከሠሪው ጋር ለሚታገል ወዮለት! በምድር ሸክላዎች መካከል ያለ ሸክላ ነው። ጭቃ ሠሪውን፦ ምን ትሠራለህ? ወይስ ሥራህ፦ እጅ የለውም ይላልን? ኢሳያስ 45፡9

ሰው እግዚአብሄር አታድርግ ያለውን ነገር በማድረግ በማመፁ ለሃጢያትና ለሰይጣን ተሽጦ ነበር፡፡ እግዚአብሄር ልጁን ኢየሱስን በመስቀል ላይ መስዋእት እንዲሆንልን በማድረግ እኛን በደሙ መልሶ ገዛን፡፡

በውድ ልጁም፥ እንደ ጸጋው ባለ ጠግነት መጠን፥ በደሙ የተደረገ ቤዛነታችንን አገኘን እርሱም የበደላችን ስርየት። ኤፌሶን 1፡7

አሁን ደግሞ በክርስቶስ ኢየሱስ አዳኝነት ያመንን ሁላችን  በክርስቶስ ኢየሱስ ደም በከበረ ዋጋ ተገዝተናል፡፡

ከአባቶቻችሁ ከወረሳችሁት ከከንቱ ኑሮአችሁ በሚያልፍ ነገር በብር ወይም በወርቅ ሳይሆን፥ ነውርና እድፍ እንደ ሌለው እንደ በግ ደም በክቡር የክርስቶስ ደም እንደ ተዋጃችሁ ታውቃላችሁ። 1ኛ ጴጥሮስ 1፡18-19

በዋጋ ተገዝታችኋልና ለራሳችሁ አይደላችሁም፤ 1ኛ ቆሮንቶስ 6፡19-20

ከአሁን በኋላ ለራሳችን በመሞት ህይወት ለሰጠን ለእርሱ እንኖራለን፡፡

ስለዚህ የራሳችን አይደለንም፡፡ ኢየሱስ የሞተው ለራሳችን እንድንሞት ነው፡፡ ኢየሱስ የሞተው ለሞተልን ለእርሱ እንድንኖር ነው እንጂ ወደፊት ለራሳችን እንዳንኖር ነው፡፡

ይህን ስለቆረጥን የክርስቶስ ፍቅር ግድ ይለናልና፤ አንዱ ስለ ሁሉ ሞተ፤ እንግዲያስ ሁሉ ሞቱ፤ በሕይወትም ያሉት ስለ እነርሱ ለሞተውና ለተነሣው እንጂ ወደ ፊት ለራሳቸው እንዳይኖሩ ስለ ሁሉ ሞተ። 2ኛ ቆሮንቶስ 5፡14-15

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ባለቤት #ዋጋ #መዋጀት #ብር #ወርቅ #ደም #ክብር #ራእይ #አላማ #ግብ #ውሳኔ #ኢየሱስ #ክርስቶስ #ጌታ #ቤተክርስትያን #አማርኛ #ስብከት #ብርሃን #መፅሃፍቅዱስ #መንፈስቅዱስ #መንገድ #ፌስቡክ #አቢይዋቁማ #አቢይዋቁማዲንሳ

የኢየሱስና የእኛ ልጅነት እንድነት እና ልዩነት

sonship_toga_virilus (2).jpgሰላም ለእናንተ ይሁን፡፡ ፅሁፌን ከሚከታተሉ ቅዱሳን መካከል በኢየሱስና በእኛ ልጅነት መካከል ስላለ ልዩነት ብታስረዳ የሚል ጥያቄ ተቀብያለሁ፡፡ እኔም ይህ ለትምህርት ለሁላችን ይጠቅማለ ብዬ ስላሰብኩ ዛሬ ስለዚህ ሃሳብ በአጭሩ አንዳንድ ነገሮችን ላነሳ ወደድኩ፡፡ ትምህርቱ በጣም ሰፊ ጊዜ የሚጠይቅ ትምህርት ነው፡፡ ስለዚህ በጣም አስፈላጊ ናቸው የምናለውን ብቻ ስለዚህ በጣምአስረዳለሁ፡፡

የኢየሱስንና የእኛን የልጅነት አንድነትና ልዩነት ለመረዳት መጀመሪያ አንድነታችንን ብንመለከት ጥሩ መንደርደሪያ ይሰጠናል፡፡

የኢየሱስና የእኛ አንድነት

  1. ኢየሱስ በስጋ ነው የተወለደው እኛም በስጋ ነው የተወለድነው፡፡

ኢየሱስ የእኛን ስጋ ነው የለበሰው፡፡ የኢየሱስ ስጋ ከእኛ ስጋ በምንም አይለይም፡፡

እንግዲህ ልጆቹ በሥጋና በደም ስለሚካፈሉ፥ . . . በሥጋና በደም እንዲሁ ተካፈለ። ዕብራዊያን 2፡14-15

  1. ኢየሱስ እኛ በምንፈተንበት ፈተና ሁሉ ተፈትኗል፡፡ አንዳንድ ሰዎች የኢየሱስ ስጋ ሃጢያትን የሚያሙዋልጭ ስጋ ነው ይላሉ፡፡ በዚህ አልስማማም፡፡ ኢየሱስ በስጋው ሃጢያት መስራት ባይችል ኖሮ አይፈተንም ነበር፡፡ ፈተና ያለው መውደቅ ስላለ ነው፡፡ አግዚአብሄር ይመስን ኢየሱስ ግን በሃጢያት ተፈተነ እንጂ በሃጢያት አልወደቀም፡፡

ኢየሱስ በሃጢያት የማይወድቅ ስጋ ቢኖረው ኖሮ ለእኛ የቅድስና ምሳሌ ሊሆንልን አይችልም ነበር፡፡

ከኃጢአት በቀር በነገር ሁሉ እንደ እኛ የተፈተነ ነው እንጂ፥ በድካማችን ሊራራልን የማይችል ሊቀ ካህናት የለንም። ዕብራዊያን 4፡15

  1. ኢየሱስ በተፈጥሮአዊ መንገድ በጥበብ እና በሞገስ ያደግ ነበር እኛም እናድጋለን

እኛ የእግዚአብሄርን ነገር አንድ ብለን ተምረን በእግዚአብሄር ነገር እንደምናድግ ሁሉ ኢየሱስን ወደምድር ሲመጣ ራሱን ባዶ በማድረጉ የተነሳ የእግዚአብሄርን ነገር አንድ ሁለት ብሎ መማርና ማደግ ነበረበት፡፡

ኢየሱስም ደግሞ በጥበብና በቁመት በሞገስም በእግዚአብሔርና በሰው ፊት ያድግ ነበር። ሉቃስ 2፡52

  1. ኢየሱስ የሚያበረታው መንፈስ ቅዱስን መቀበል ነበረበት

በስጋው ወራት ካለመንፈስ ቅዱስ አሸናፊ የእግዚአብሄ ልጅ ሆኖ ማለፍ ስለማይችል መንፈስ ቅዱስን መሞላት አስፈልጎታል፡፡

ኢየሱስም መንፈስ ቅዱስ መልቶበት ከዮርዳኖስ ተመለሰ፥ በመንፈስም ወደ ምድረ በዳ ተመርቶ፥ ሉቃስ 4፡1

  1. በእግዚአብሄር ከኢየሱስ ጋር እኩል ተወደናል

እግዚአብሄር ኢየሱስን ከሚወደው ያነሰ እኛን አይወደንም፡፡

እንዲሁም ዓለም አንተ እንደ ላክኸኝ በወደድኸኝም መጠን እነርሱን እንደ ወደድሃቸው ያውቃል። ዮሃንስ 17፡22-23

  1. ከኢየሱስ ጋር ወንድማማቾች ነን

ኢየሱስ የእግዚአብሄር ልጅ ነው እኛም የእግዚአብሄር ልጆች ነን፡፡ ኢየሱስ ወንድሞቼ ብሎ ሊጠራን አላፈረብንም፡፡

የሚቀድሰውና የሚቀደሱት ሁሉ ከአንድ ናቸውና፤ ስለዚህም ምክንያት፦ ስምህን ለወንድሞቼ እነግራቸዋለሁ በማኅበርም መካከል በዜማ አመሰግንሃለሁ፤ ደግሞም፦ እኔ በእርሱ እታመናለሁ፤ ደግሞም፦ እነሆኝ እኔን እግዚአብሔር የሰጠኝንም ልጆች ሲል ወንድሞች ብሎ ሊጠራቸው አያፍርም። ዕብራዊያን 2፡11-13

  1. ኢየሱስን እንድንመስል ነው የተወሰንነው

ልጁ በብዙ ወንድሞች መካከል በኵር ይሆን ዘንድ፥ አስቀድሞ ያወቃቸው የልጁን መልክ እንዲመስሉ አስቀድሞ ደግሞ ወስኖአልና፤ ሮሜ 8፡29

ኢየሱስ ወደምድር የመጣው የእግዚአብሄር ልጅነትን ምሳሌ ሊያሳየን ናሙና ሊሆንልን ነው፡፡ አንድ ልጅ በአባቱ ዘንድ ያለውን ክብር ሊያሳየን ነው፡፡

ቃልም ሥጋ ሆነ፤ ጸጋንና እውነትንም ተመልቶ በእኛ አደረ፥ አንድ ልጅም ከአባቱ ዘንድ እንዳለው ክብር የሆነው ክብሩን አየን። ዮሃንስ 1፡14

  1. ኢየሱስ በምድር ላይ እንደተላከ እኛም ተልከናል፡፡

ኢየሱስም ዳግመኛ፦ ሰላም ለእናንተ ይሁን፤ አብ እንደ ላከኝ እኔ ደግሞ እልካችኋለሁ አላቸው። ዮሃንስ 20፡21

 

በኢየሱስና በእኛ ልጅነት መካከል ምንም ልዩነት የለም፡፡ ነገር ግን ከዚህ በታች የተዘረዘሩትን ነገሮች መመልከት ይጠቅመናል፡፡

የኢየሱስና የእኛ ልዩነት

  1. ኢየሱስ ሃጢያት ሰርቶ አያውቅም እኛ ግን በንስሃ ከሃጢያታችን ተመልሰን ነው፡፡

እኛ በእርሱ ሆነን የእግዚአብሔር ጽድቅ እንሆን ዘንድ ኃጢአት ያላወቀውን እርሱን ስለ እኛ ኃጢአት አደረገው። 2ኛ ቆሮንቶስ 5፡21

  1. ኢየሱስ የሞተ መንፈስ ኖሮት አያውቅም እኛ ግን በአዳም በሃጢያት ከእግዚአብሄር የተለየው መንፈሳችን ዳግመኛ ተወልዶ ነው፡፡

ኢየሱስም መልሶ፦ እውነት እውነት እልሃለሁ፥ ሰው ዳግመኛ ካልተወለደ በቀር የእግዚአብሔርን መንግሥት ሊያይ አይችልም አለው። ዮሃንስ 3፡3

  1. ኢየሱስ ወደ ምድር ከመምጣቱ በፊት የእግዚአብሄር ብቸኛ ልጁ ነበር፡፡

በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና። ዮሃነስ 3፡16

  1. እኛ ከዳንን በኋላ የእግዚአብሔር ልጆች በመሆናችን ኢየሱስ የመጀመሪያ ልጅ ሆኗል

ኢየሱስ የሃጢያታችንን እዳ ከከፈለ በኋላ እና እኛም ለእኔ ነው ብለን ስንቀበለው የእግዚአብሄር ልጆች በመሆናችን የእግዚአብሄር አንድያ ልጅ የነበረው ኢየሱስ የመጀመሪያ ልጅ ሆኗል፡፡ አሁን ኢየሱስ የመጀመሪያ ልጅ እንጂ አንድያ ልጅ አይደለም፡፡

ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ ዮሃነስ 1፡12

ልጁ በብዙ ወንድሞች መካከል በኵር ይሆን ዘንድ፥ አስቀድሞ ያወቃቸው የልጁን መልክ እንዲመስሉ አስቀድሞ ደግሞ ወስኖአልና፤ አስቀድሞም የወሰናቸውን እነዚህን ደግሞ ጠራቸው፤ የጠራቸውንም እነዚህን ደግሞ አጸደቃቸው፤ ያጸደቃቸውንም እነዚህን ደግሞ አከበራቸው። ሮሜ 8፡29-30

  1. ኢየሱስ አዳኛችንና ቀዳሻችን ነው

ሁላችንም በሃጢያት እስራት ውስጥ ወድቀን በነበርን ጊዜ ስለሃጢያታችን እዳ መስዋእት የሆነልን ኢየሱስ ነው፡፡

የሚቀድሰውና የሚቀደሱት ሁሉ ከአንድ ናቸውና፤ ስለዚህም ምክንያት፦ ስምህን ለወንድሞቼ እነግራቸዋለሁ በማኅበርም መካከል በዜማ አመሰግንሃለሁ፤ ደግሞም፦ እኔ በእርሱ እታመናለሁ፤ ደግሞም፦ እነሆኝ እኔን እግዚአብሔር የሰጠኝንም ልጆች ሲል ወንድሞች ብሎ ሊጠራቸው አያፍርም። ዕብራዊያን 2፡11-13

  1. ኢየሱስ ጌታችን ነው እኛ ተከታዮቹ ነን

ኢየሱስ ጌታ እንደ ሆነ በአፍህ ብትመሰክር እግዚአብሔርም ከሙታን እንዳስነሣው በልብህ ብታምን ትድናለህና፤ ሮሜ 10፡9

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #የልጅነትክብር #ናሙና #አንድያ #በኩር #አማርኛ #ስብከት #መዳን #መፅሃፍቅዱስ #ቃል #ሞዴል #መምሰል #የእግዚአብሄርእቅድ #የእግዚአብሄርፈቃድ #አቢይ #አቢይዋቁማ #አቢይዋቁማዲንሳ

ምሥጢሩም የክብር ተስፋ ያለው ክርስቶስ በእናንተ ዘንድ መሆኑ

secrat.jpgለእነርሱም እግዚአብሔር በአሕዛብ ዘንድ ያለው የዚህ ምሥጢር ክብር ባለ ጠግነት ምን እንደ ሆነ ሊያስታውቅ ወደደ፥ ምሥጢሩም የክብር ተስፋ ያለው ክርስቶስ በእናንተ ዘንድ መሆኑ ነው። ቆላስይስ 1፡27

እግዚአብሄር ልጆቹ ሁሉ አንዲያሸንፉ ስለፈለገ በነገር ሁሉ ያሸነፈው ኢየሱስ በሚያምኑት ሁሉ ውስጥ እንዲኖርና እነርሱ እንዲያሸንፉ አደረገ፡፡

ከእግዚአብሔር የተወለደ ሁሉ ዓለምን ያሸንፋልና፤ ዓለምንም የሚያሸንፈው እምነታችን ነው። 1ኛ ዮሐንስ 5፡4

. . . ክርስቶስም በልባችሁ በእምነት እንዲኖር እንደ ክብሩ ባለ ጠግነት መጠን ይስጣችሁ፤ . . . ኤፌሶን 3፡16-17

ክርስቶስ የክብር ተስፋ አለው፡፡ የክብር ተስፋ የለው ኢየሱስ በመንፈስ ቅዱስ አማካኝነት በእኛ ውስጥ ይኖራል፡፡

አንድ እቃ መግዛት ከፈለጋችሁ ቀብድ ታስይዛላችሁ፡፡ ቅበድ አስያዛችሁ ማለት እቃው ለእናንተ ይቀመጥላችኋል እንጂ የሌላ ሰው ሊሆን አይችልም፡፡ ሌላ ገዢ ከመጣ ቀብድ ተከፍሎበታል አይሸጥም ይባላል፡፡

እንዲሁም እግዚአብሔር በክርስቶስ የደም ዋጋን በመክፈል የእርሱ አድርጎናል፡፡ የእርሱ መሆናችንን ማረጋገጫ የሚሆንብን የመንፈሱን መያዣ ሰጥቶናል፡፡ እኛ የእርሱ ነን፡፡ ተስፋችን ሙሉ ነው፡፡

ለዚሁ የሠራን እግዚአብሔር ነው እርሱም የመንፈሱን መያዣ ሰጠን።2ኛ ቆሮንቶስ 5:5

በምድር ላይም አሸናፊ ሆነን የምንኖረው የክብር ተስፋ በእኛ ውስጥ ስላለ ነው፡፡ የምድር አሸናፊነታችንም ተስፋ በሰማይና ምድር ሁሉ ስልጣን የተሰጠው ክርስቶስ በእኛ ውስጥ መሆኑ ነው፡፡

በሃይማኖት ብትኖሩ ራሳችሁን መርምሩ፤ ራሳችሁን ፈትኑ፤ ወይስ ምናልባት የማትበቁ ባትሆኑ፥ ኢየሱስ ክርስቶስ በእናንተ ውስጥ እንዳለ ስለ እናንተ አታውቁምን? 2ኛ ወደ ቆሮንቶስ ሰዎች 13፡5

ለእነርሱም እግዚአብሔር በአሕዛብ ዘንድ ያለው የዚህ ምሥጢር ክብር ባለ ጠግነት ምን እንደ ሆነ ሊያስታውቅ ወደደ፥ ምሥጢሩም የክብር ተስፋ ያለው ክርስቶስ በእናንተ ዘንድ መሆኑ ነው። ቆላስይስ 1፡27

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #በልባችን #የእግዚአብሄርቤተመቅደስ #ክርስቶስ #ክርስቶስበእኛ #ቤተክርስትያን #አማርኛ #የእግዚአብሄርቃል #መፅሃፍቅዱስ #ክርስቶስ #አቢይ #አቢይዋቁማ #አቢይዋቁማዲንሳ #በመንፈሱ #የእግዚአብሄርቤተመቅደስ #እምነት

ከፀሐይም በታች አዲስ ነገር የለም

nothing new under the sun.jpgየሆነው ነገር እርሱ የሚሆን ነው፥ የተደረገውም ነገር እርሱ የሚደረግ ነው፤ ከፀሐይም በታች አዲስ ነገር የለም። መክብብ 1፡9

በምድር ላይ ቢሆንልኝ ብለን እጅግ ስንመኘው የነበረ ስናገኘው ለዚህ ነው እንደዚህ የሆንኩት ብለናል፡፡ በምድር ላይ እንደተራራ ገዝፎብን የነበረ ላይ እንደተራራት ትንሽነቱ አስገርሞናል፡፡ በምድር ላይ ስንናፍቀው የነበረ ስናገኘው ሰልችቶናል፡፡ በምድር ላይ እንደ አድማስ ርቆብን የነበረ ነገር ስንቀርበው ምንም አዲስነት አላገኘንበትም፡፡ እደርስበት ይሆን ብለን እጅግ የፈለግነው ውይ ይሄ ነው እንዴ ብለናል፡፡

በምድር ላይ ብናገኘው ህይወታችን ይለወጣል ብለን አስበን የነበረው ነገር ህይወታችንንን ሊለውጥ ሳይችልና ሲቀር ቅር ሲያሰኘን ምስክር ሆነናል፡፡

በምድር ላይ ይህ ያላቸው ሰዎች የታደሉ ናቸው ብለን ያሰብናቸው ሰዎች ያገኙትን ስናገኝ ቀድሞ እንዳስብነው እንዳልታደሉ ደርሰንበታል፡፡ አሁንም ሰዎች እኛ ፈልገን ስናገኘው የተሰናከልንበትን ነገር እጅግ ሲፈልጉ ስናይ ይህ የተሳተ ግምታቸው ነግሩን ባገኙት ጊዜ ቅር እንደሚያሰኛቸው ስለምናውቅ እናዝናላቸዋለን፡፡

በምድር ላይ አንዲህ ብሆን እኮ ብለን የተመኘነውን ስንሆን ወዲያው ረስተነው አሁን ደግሞ ፍላጎታችን እጅግ የተለየ ሆኗል፡፡

ከሰማይት በታች አዲስ ነገር የለም፡፡ አዲስ ነገር ያለ ከመሰለን ስላልደረስንበት ብቻ ነው፡፡ የደረሱበት ምንም አዲስ ነገር እንደሌለ እንደተረዱት ስንደርስነበት ምንም አዲስ ነገር እንደሌለ ይገባናል፡፡ ውይ እነርሱን ባደረገኝ የምንላቸው ሰዎች ከዚህ መቼ በወጣሁ ብለው ሲመኙ ደርሰናል፡፡

ብቻኛው አዲሱ ነገር የእግዚአብሄርን ስራ በምድር ላይ ሰርቶ እግዚአብሄርን በህይወታችንና በአገልግሎታችን ማክበር ነው፡፡

እኔ ላደርገው የሰጠኸኝን ሥራ ፈጽሜ በምድር አከበርሁህ፤ ዮሃንስ 17፡4

ብቸኛው አዲሱ ነገር ሰውን መውደድ ፣ ሰውን ማገልገል ፣ ሰውን መጥቀምና ሰውን ማንሳት ነው፡፡

በምድር ላይ አዲሱ ነገር በዘላለማዊ እይታ የምድር ህይወትን እንደ እንግድነት መኖር ብቻ ነው፡፡ አዲሱ ነገር በምድር ላይ እንደ እግዚአብሄር መልክተኛ ፈቃዱን ፈፅሞ ማለፍ ብቻ ነው፡፡ በምድር ላይ አዲሱ ነገር በሰማይ መዝገብን መሰብሰብ ነው፡፡

ብልና ዝገት በሚያጠፉት ሌቦችም ቆፍረው በሚሠርቁት ዘንድ ለእናንተ በምድር ላይ መዝገብ አትሰብስቡ፤ ነገር ግን ብልም ዝገትም በማያጠፉት ሌቦችም ቆፍረው በማይሠርቁት ዘንድ ለእናንተ በሰማይ መዝገብ ሰብስቡ፤ ማቴዎስ 6፡19-20

በምድር አዲሱ ነገር በዘላለማዊ ሽልማትን እንደሚቀበል ራስን መግዛት ነው፡፡ በምድር አዲሱ ነገር በምድር ገንዘብ የዘላለም ወዳጆችን ማፍራት ነው፡፡

እኔም እላችኋለሁ፥ የዓመፃ ገንዘብ ሲያልቅ በዘላለም ቤቶች እንዲቀበሉአችሁ፥ በእርሱ ወዳጆችን ለራሳችሁ አድርጉ። ሉቃስ 16፡9

ብቸኛው አዲስ ነገር በምድር ለሚቀር ዘላለማዊ ላልሆነ ለጊዜያዊ መብል አለመስራትና ዘላለማዊ ለሆነ ለማይጠፋ መብል መስራት ነው፡፡

ለሚጠፋ መብል አትሥሩ፤ ነገር ግን ለዘላለም ሕይወት ለሚኖር መብል የሰው ልጅ ለሚሰጣችሁ ሥሩ፤ እርሱን እግዚአብሔር አብ አትሞታልና። ዮሃንስ 6፡27

ዓለሙም ምኞቱም ያልፋሉ፤ የእግዚአብሔርን ፈቃድ የሚያደርግ ግን ለዘላለም ይኖራል። 1ኛ ዮሃንስ 2፡17

አዲሱ ነገር ጌታ ኢየሱስ ብቻ ነው፡፡ አዲሱ ነገር ከጌታ ጋር መኖር ነው፡፡ አዲሱ ነገር ጌታን መውደድ ነው፡፡ አዲሱ ነገር ጌታን ኢየሱስን መከተል ብቻ ነው፡፡ ዘመን የማይሽረው አዲሱ ነገር ጌታን መውደድ ፣ ጌታን መከተል ፣ ጌታን ማገልገል ብቻ ነው፡፡

ከላይ የሚመጣው ከሁሉ በላይ ነው፤ ከምድር የሚሆነው የምድር ነው የምድሩንም ይናገራል። ከሰማይ የሚመጣው ከሁሉ በላይ ነው። ዮሃንስ 3፡31

ለተጨማሪ ፅሁፎች https://www.facebook.com/abiy.wakuma/notes

#ኢየሱስ #ጌታ #ዘላለማዊ #አዲስ #ልብ #ሰማይ #ዘላለም #ጌታ #ከፀሐይበታች #ያልፋሉ #ቤተክርስትያን #አማርኛ #ስብከት #መዳን #መፅሃፍቅዱስ #ሰላም #አቢይ #አቢይዋቁማ #አቢይዋቁማዲንሳ #ወንጌል #መናገር #ፅናት #ትግስት #መሪ

አለቅነትም በጫንቃው ላይ ይሆናል

jesus.jpgሕፃን ተወልዶልናልና፥ ወንድ ልጅም ተሰጥቶናልና፤ አለቅነትም በጫንቃው ላይ ይሆናል፤ . . . የሰላም አለቃ ተብሎ ይጠራል። ኢሳይያስ 9፡6

የአለቅነት ብቸኛው ጥቅም ሰዎች ሲገለገሉና ሲጠቀሙ ማየት ነው፡፡ አለቅነት በራሱ ጥቅም አይደለም፡፡ የአለቅነት ጥቅም ሰዎች ካሉበት እግዚአብሄር ወደ አየላቸው ደረጃ ሲደርሱ ማየት ነው፡፡ አለቅነት ሰዎች ከታሰሩበት ነገር ተፈትተው በነፃነት እግዚአብሄርን ሲያገለግሉ ማየት ነው፡፡

አለቅነትን ለራሳቸው ጥቅም የሚጠቀሙበት ሰዎች በአለም ላይ ስላሉ አለቅነት ከጥቅም ጋር ተያይዞዋል፡፡ በአገራችንም ያለውም አባባል ሲሺም ያልበላ ሲሻር ይቆጨዋል የሚለው አባባል የመጣው አለቅነትን ከተጠቃሙነት ጋር አያይዞ ነው፡፡ ነግር ግን አባባሉ መሆን የነበረበት “ሲሾም በትጋትና በታማኝነት ህዝብን ያላገለገለ ሲሻር ይቆጨዋል” መሆን ነበረበት፡፡ አለቅነት ሰውን ከመጥቀም ያለፈ ጥቅም የለውም፡፡ አለቅነት ግን እግዚአብሄርን አገልግሎ ከእግዚአብሄር ሽልማትን ከመቀበል ውጭ ጥቅማ ጥቅም የለውም፡፡

የአለቅነትን ሃላፊነት የተረዱ ሰዎች አለቅነትን እንደ ጥቅም አይጓጉለትም፡፡ የአለቅነት ሃላፊነትን የተረዱ ሰዎች ሸክሙ እንጂ ጥቅሙ ትዝ አይላቸውም፡፡ የአለቅነትን ሸክም የተረዱ ሰዎች አላቅነትን እንደጥቅም አይፈልጉትም፡፡

እርግጥ ነው በአለም ያሉ ሰዎች አለቅነትን እንደመጠቀሚያ ይጠቀሙበታል፡፡ በአለም ያሉ ሰዎች ከሰው ውስጥ ትልቁን ድርሻ ለመጠቀም የአለቅነትን ስልጣን በጭካኔ ይጠቀሙበታል፡፡ በአለም ብዙ አለቅነት ያለው ብዙ ይጠቀማል ትንሽ አለቅነት ያለው ትንሽ ይጠቀማል፡፡ በአለም ያሉ ሰዎች አለቅነትን ሰውን ለመበዝበዝ ይጠቀሙበታል፡፡

ኢየሱስ ግን ወደ እርሱ ጠርቶ እንዲህ አላቸው፦ የአሕዛብ አለቆች እንዲገዙአቸው ታላላቆቹም በላያቸው እንዲሠለጥኑ ታውቃላችሁ። ማቴዎስ 20፡25-26

አለቅነትን ለራስ ጥቅም መጠቀሚያ ማድረግ የእግዚአብሄር ሃሳብ አይደለም፡፡ አለቅነት የመጠቀሚያ መንገድ አይደለም፡፡

በእናንተ ዘንድ ያለውን የእግዚአብሔርን መንጋ ጠብቁ፤ እንደ እግዚአብሔር ፈቃድ በውድ እንጂ በግድ ሳይሆን፥ በበጎ ፈቃድ እንጂ መጥፎውን ረብ በመመኘት ሳይሆን ጐብኙት፤ ለመንጋው ምሳሌ ሁኑ እንጂ ማኅበሮቻችሁን በኃይል አትግዙ፤ 1ኛ የጴጥሮስ መልእክት 5፡2-3

አለቅነት ሃላፊነት ነው፡፡ አለቅነት ሸክም ነው፡፡ አለቅነት የትጋት ስራ ነው፡፡ አለቅነት ታማኝነት ነው፡፡ አለቅነት መሰጠት ነው፡፡ አለቅነት ፊት ቀዳሚነት ነው፡፡ አለቅነት ማንም ባያደርገው እኔ አደርገዋለሁ ማለት ሃላፊነት መውሰድ ነው፡፡ አለቅነት ምሪትን በየጊዜው በመስጠት የመጥቀም የማገልገል መንገድ ነው፡፡

በእናንተስ እንዲህ አይደለም፤ ነገር ግን ማንም ከእናንተ ታላቅ ሊሆን የሚወድ የእናንተ አገልጋይ ይሁን፥ ከእናንተም ማንም ፊተኛ ሊሆን የሚወድ የእናንተ ባሪያ ይሁን፤ እንዲሁም የሰው ልጅ ሊያገለግል ነፍሱንም ለብዙዎች ቤዛ ሊሰጥ እንጂ እንዲያገለግሉት አልመጣም። ማቴዎስ 20፡26-28

አለቅነት ሰላምን መስጠት ነው፡፡ አለቅነት ሰዎችን ወደ ሰላም ምንም ወዳልጎደለበትና ምንም ወዳልተበላሸበት ቦታ መርቶ ማድረስ ነው፡፡

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ሰላም #ድንቅመካር #ሃያልአምላክ #የሰላምአለቃ #የዘላለምአባት #ኢየሱስ #ክርስቶስ #ጌታ #ማገልገል #ቤተክርስትያን #አማርኛ #ስብከት #እምነት #መፅሃፍቅዱስ #መንፈስቅዱስ #አለቅነት #ፌስቡክ #አቢይዋቁማ #አቢይዋቁማዲንሳ

#ኢየሱስ

#ኢየሱስ.jpgየገና በአል ትርጉም የተረሳ ይመስላል፡፡ የገና በአል ሲታሰብ መብላት ከታሰበ ፣ የገና በአል ሲታሰብን መጠጣት ከታሰበ ፣ የገና በአል ሲታሰንብ መልበስ ከታሰበ ፣ የገና በአል ሲታሰብ የገና ዛፍ ከታሰበ የገና በአል ሲታሰብ ከረሜላ እና ቸኮሌት ከታሰበ ፣ የገና በአለ ሲታሰብ ጣፋጭ ብስኩትና ኬክ ከታሰበ ፣ የገና በአል ሲታሰብ እረፍትና መዝናናት ከታሰበ ፣ የገና በአልዕ ሲታሰብ ዘፈንና ዳንራ ከታሰበበ ፣ የገና በአል ሲታሰብ መጠጣትና መስከር ከታሰበ ምንም ሃይማኖተኛ ብንሆን የገናን ትርጉም አናውቀውም ማለት ነው፡፡

ገና የሚበላበት የሚጠጣበት የሚዘፈንበት የሚጨፈርበት አይደለም፡፡ ገና እግዚአብሄር ለሰዎች የሰጠው ስጦታ ኢየሱስ የሚዘከርበት እግዚአብሄር የሚመሰገንበትና በስጦታው ምክኒያት ያገኘነው የክርስትና ነፃነት በአል የሚደረግበት ጊዜ ነው፡፡ ገና የእግዚአብሄርን ስጦታ የማክበርበት ጊዜ ነው፡፡ ገና የእግዚአብሄርን ስጦታ የምናጣጥምበት ጊዜ ነው፡፡

የገና ምክኒያት ኢየሱስ ነው፡፡

ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። ማቴዎስ 1፡21

የገና ምክኒያት እግዚአብሄር ለሰው ልጆች ስጦታ መስጠቱ ነው፡፡

በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና። ዮሃንስ 3፡16

የገና ምክኒያት ስጦታውን የተቀበሉ ከሃጢያት መዳናቸው ነው፡፡

እንደ ምሕረቱ መጠን ለአዲስ ልደት በሚሆነው መታጠብና በመንፈስ ቅዱስ በመታደስ አዳነን እንጂ፥ እኛ ስላደረግነው በጽድቅ ስለ ነበረው ሥራ አይደለም፤ ቲቶ 3፡5

የገና በአል በእግዚአብሄር ስጦታ ከእግዚአብሔር ጋር መታረቃችን ነው፡፡

እግዚአብሔር በክርስቶስ ሆኖ ዓለሙን ከራሱ ጋር ያስታርቅ ነበርና፥ በደላቸውን አይቆጥርባቸውም ነበር፤ በእኛም የማስታረቅ ቃል አኖረ። 2ኛ ቆሮንቶስ 5፡19

የገና በአል ኢየሱስን የተቀበልን የእግዚአብሄር ልጅ መሆናችን ነው፡፡

ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ ዮሃንስ 1፡12

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ገና #በዓል #ፍቅር #ተስፋ #ደስታ #መስዋእት #ሃጢያት #መዳን #ነፃነት ## #ቤተክርስትያን #አማርኛ #ስብከት #ብርሃን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  #ኢየሱስ #ጌታ

ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ

apple-464182_1920.jpgእርሱ ግን ይህን ሲያስብ፥ እነሆ የጌታ መልአክ በሕልም ታየው፥ እንዲህም አለ፦ የዳዊት ልጅ ዮሴፍ ሆይ፥ ከእርስዋ የተፀነሰው ከመንፈስ ቅዱስ ነውና እጮኛህን ማርያምን ለመውሰድ አትፍራ። ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። ማቴዎስ 1፡20-21

በበደላችሁና በኃጢአታችሁ ሙታን ነበራችሁ፤ . . . ከወደደን ከትልቅ ፍቅሩ የተነሣ በበደላችን ሙታን እንኳ በሆንን ጊዜ ከክርስቶስ ጋር ሕይወት ሰጠን፥ በጸጋ ድናችኋልና፥ ኤፌሶን 2:1-2

የኃጢአት ደመወዝ ሞት ነውና፤ የእግዚአብሔር የጸጋ ስጦታ ግን በክርስቶስ ኢየሱስ በጌታችን የዘላለም ሕይወት ነው። ሮሜ 6፡23

እኛ በእርሱ ሆነን የእግዚአብሔር ጽድቅ እንሆን ዘንድ ኃጢአት ያላወቀውን እርሱን ስለ እኛ ኃጢአት አደረገው። 2ኛ ቆሮንቶስ 5፡21

በኃጢአታችን ብንናዘዝ ኃጢአታችንን ይቅር ሊለን ከዓመፃም ሁሉ ሊያነጻን የታመነና ጻድቅ ነው። 1ኛ ዮሃንስ 1፡9

እነርሱም፦ በጌታ በኢየሱስ ክርስቶስ እመን አንተና ቤተ ሰዎችህ ትድናላችሁ አሉት። ሃዋሪያት 16፡31

እንደ ምሕረቱ መጠን ለአዲስ ልደት በሚሆነው መታጠብና በመንፈስ ቅዱስ በመታደስ አዳነን እንጂ፥ እኛ ስላደረግነው በጽድቅ ስለ ነበረው ሥራ አይደለም፤ ቲቶ 3፡5

ጴጥሮስም፦ ንስሐ ግቡ፥ ኃጢአታችሁም ይሰረይ ዘንድ እያንዳንዳችሁ በኢየሱስ ክርስቶስ ስም ተጠመቁ፤ የመንፈስ ቅዱስንም ስጦታ ትቀበላላችሁ። ሐዋሪያት 2፡38

ኢየሱስም ያመኑትን አይሁድ፦ እናንተ በቃሌ ብትኖሩ በእውነት ደቀ መዛሙርቴ ናችሁ፤ እውነትንም ታውቃላችሁ እውነትም አርነት ያወጣችኋል አላቸው። ዮሃነስ 8፡31-32

ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። ማቴዎስ 1፡21

ሃጢያታችን ይቅር ካልተባለ ፣ በክርስቶስ ደም ይቅር ካልተባልን ፣ ከእግዚአብሄር ጋር ካልታረቅን ፣ የእግዚአብሄር ልጆች ካልሆንን ፣ በኢየሱስ ከሃጢያት ሃይል ካልዳንን ፣ የእግዚአብሄር መንግስት የመንግስተሰማያት ወራሾች ካልሆንን ኢየሱስ ወደምድር የመጣበትን ምክኒያት አጥተነዋል፡፡

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ገና #በዓል #ፍቅር #ተስፋ #ደስታ #መስዋእት #ሃጢያት #መዳን #ነፃነት ## #ቤተክርስትያን #አማርኛ #ስብከት #ብርሃን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  #የዋህነት #ንፁህ

የሃቀኛው ንጉስ ታሪክ

Jesus-RealName-GettyImages-77886330-57a36c913df78cf4590bc046.jpgኢየሱስ ወደ ምድር የመጣበት ምክኒያቶች አሉ፡፡ ኢየሱስ ራሱን ሳያዋርድ በእግዚአብሄር መልክ እየኖረ እኛን ያላዳነበት ምክኒያት አለው፡፡ ኢየሱስ በስጋ መወለድ የነበረበት 5 ምክንያቶችን ከእግዚአብሄር ቃል እንመልከት፡፡

ኢየሱስ በስጋ መወለድ የነበረበት 5 ምክንያቶች፡-

የእግዚአብሄር ፅድቅ ስለሚጠይቀው ነው፡፡

በድሮ ዘመን በአንድ አገር ውስጥ አንድ ሀቀኛ ንጉስ ይኖር ነበረ ይባላል ፡፡ አንድ ጊዜ ይህንን ጥፋት ያጠፋ ሰው በአርባ ግርፋት ይቀጣል ብሎ ህግ ያወጣል፡፡ ያ ንጉስ ሲኖር ሲኖር ቆይቶ አንድ ቀን ይህን ያደረገ አርባ ይገረፋል ብሎ የተናገረበትን ጥፋት ያጠፋ ሰው ይዘውለት ይመጣሉ፡፡ ያ ጥፋተኛ እናቱ ነበረች፡፡ ንጉሱ እናቱ ጋር ሲደረስ ህጉን ለመሻር አልቻለም፡፡

ስለዚህ እንዲህ አለ፡፡ ስለ እናቴ ስል የሃገሩ ህግ ብሽር እውነተኛ አልሆንም፡፡ ነገር ግን ስለእናቴ ስል  አርባውን ግርፋት እኔ ራሴ እገረፍላታለሁ በማለት ህጉንም ሳይሽረው ህጉንም ለመፈፀም በእናቱ ፋንታ አርባውን ግርፋት ተገረፈላት ይባላል፡፡

ሃጢያትን የሰራች ነፍስ እርሱዋ ትሞታለች ያለው እግዚአብሄር ቃሉን አይለውጥም፡፡ በተቃራኒው ደግሞ እግዚአብሄር በመልክና በአምሳሉ የፈጠረው ሰው ለዘላለም ከእርሱ ሲለያይ ማየት አልወደደም፡፡ ስለዚህ ህጉንም ሳይለውጥ ህጉን የሚፈፅምበትን መንገድ አዘጋጀ፡፡ ስለዚህ ሃጢያት ያላቀውን ልጄን እልካለሁ፡፡ ስለሃጢያታቸው ሙሉውን የሞት ዋጋ ይከፍላል በማለት አብ ኢየሱስን ወደ ምድር ላከው፡፡

ኢየሱስ ወደምድር የተላከው ሃጢያትን የሰራች ነፍስ እርስዋ ትሞታለች የሚለው የፅድቅ ቃል ሙሉ ለሙሉ እንዲፈፀም ነው፡፡

ኃጢአትን የምትሠራ ነፍስ እርስዋ ትሞታለች፤ ሕዝቅኤል 18፡20

የሰው ልጅ ሊፈፅም ያልቻለውን እግዚአብሄር በሃጢያተኛ ልጅ ምሳሌ አድርጎ ኢየሱስን በመላክ የህጉን ፍላጎት ሁሉ ፈፅሞታል፡፡

ከሥጋ የተነሣ ስለ ደከመ ለሕግ ያልተቻለውን፥ እግዚአብሔር የገዛ ልጁን በኃጢአተኛ ሥጋ ምሳሌ በኃጢአትም ምክንያት ልኮ አድርጎአልና፤ እንደ መንፈስ ፈቃድ እንጂ እንደ ሥጋ ፈቃድ በማንመላለስ በእኛ የሕግ ትእዛዝ ይፈጸም ዘንድ ኃጢአትን በሥጋ ኰነነ። ሮሜ 8፡3-4

ኢየሱስ ወደ ምድር የመጣው ምንም ቢወደንም ስለሚወደን እኛ ጋር ሲደርስ ህጉን ስለማይሽር ፃዲቅ ስለሆነ ነው፡፡

ኢየሱስ በስጋ መወለድ የነበረበት – ለእኛ የትህትናና የልጅነት ክብር ምሳሌ ለመሆን ነው

እግዚአብሄርን ያየው አንድስ እንኳን የለም፡፡ እግዚአብሄርን ወደምድር ወርዶ በሰው ቋንቋ የተረከው ኢየሱስ ነው፡፡ የእግዚአብሄር ልጅ በአባቱ ዘንድ ያለውን ክብር በተግባር ያየነው በኢየሱስ ነው፡፡ ኢየሱስን አይተን ነው የልጅነት ስልጣናችንን የምንረዳው፡፡ ኢየሱስን አይተን ነው ፀሎታችን በእግዚአብሄር ዘንድ እንዴት እንደሚሰማ የምናውቀው፡፡ እግዚአብሄር ኢየሱስን እንዴት እንደወደደው አይተን ነው እኛን እንዴት እንደወደደን የምናውቀው፡፡

እኛም አንድ እንደ ሆንን አንድ ይሆኑ ዘንድ፤ እኔም በእነርሱ አንተም በእኔ ስትሆን፥ በአንድ ፍጹማን እንዲሆኑ፥ የሰጠኸኝን ክብር እኔ ሰጥቻቸዋለሁ፤ እንዲሁም ዓለም አንተ እንደ ላክኸኝ በወደድኸኝም መጠን እነርሱን እንደ ወደድሃቸው ያውቃል። ዮሃንስ 17፡22-23

እግዚአብሄር በተለያየ መንገድ ራሱን በከፊል ቢገልጽፅም ኢየሱስ ግን የእግዚአብሄር ሙሉ ነፀብራቅ ነው፡፡

መቼም ቢሆን እግዚአብሔርን ያየው አንድ ስንኳ የለም፤ በአባቱ እቅፍ ያለ አንድ ልጁ እርሱ ተረከው። ዮሃንስ 1፡18

ከጥንት ጀምሮ እግዚአብሔር በብዙ ዓይነትና በብዙ ጎዳና ለአባቶቻችን በነቢያት ተናግሮ፥ ሁሉን ወራሽ ባደረገው ደግሞም ዓለማትን በፈጠረበት በልጁ በዚህ ዘመን መጨረሻ ለእኛ ተናገረን፤ እርሱም የክብሩ መንጸባረቅና የባሕርዩ ምሳሌ ሆኖ፥ ዕብራውያን 1፡1-3

ኢየሱስ በስጋ መወለድ የነበረበት – ሰይጣንን እንደ ሰው ለመርታት ነው

እግዚአብሄር ሰውን የፈጠረው በመልኩና በአምሳሉ ነው፡፡ እግዚአብሄረ ሰውን የፈጠረው እንዲገዛ ነው፡፡ የዚህ አለም ገዢ ሰው ነበር፡፡ ሰው ግን እግዚአብሄርን መታዘዝ ትቶ የሰይጣንን ቃል ሲሰማ የልጅነት የገዢነት ስልጣኑን አጣው፡፡ ሰው በራሱ እጅ ነው ስልጣኑን ለሰይጣን አሳልፎ የሰጠው፡፡ ሰይጣን የዚህ አለም ገዢ እንዲሆን ያደረገው ሰው ነው፡፡

ስለዚህ በሰው አለመታተዘዝ የታጣውን ስልጣን መመለስ የሚቻለው በሰው መታዘዝ ነው፡፡ በሰው ሃጢያት የተነጠቀውን የሰውን ስልጣን መመለስ የሚቻለው ሃጢያት በሌለበት ሰው ነው፡፡ በሰው የተነጠቀውን ስልጣን በአምላክ መመለስ አግባብ አይደለም፡፡

እንግዲህ ልጆቹ በሥጋና በደም ስለሚካፈሉ፥ እርሱ ደግሞ በሞት ላይ ሥልጣን ያለውን በሞት እንዲሽር፥ ይኸውም ዲያብሎስ ነው፥ በሕይወታቸውም ሁሉ ስለ ሞት ፍርሃት በባርነት ይታሰሩ የነበሩትን ሁሉ ነጻ እንዲያወጣ፥ በሥጋና በደም እንዲሁ ተካፈለ። ዕብራውያን 2፡14-15

አለቅነትንና ሥልጣናትን ገፎ፥ ድል በመንሣት በእርሱ እያዞራቸው በግልጥ አሳያቸው።  ቆላስይስ 2፡15

ኢየሱስ በምድር ላይ እንደፍፁም ሰው ባይመላለሰ ኖሮ ኢየሱስን እንድንመስል አይጠበቅብንንም ነበር፡፡ ኢየሱስ እንደ እኛው በነገር ሁሉ ተፈትኖ እንደ ሰውነት ባይኖር ኖሮ ክርስቶስን መምሰላችን ተግባራዊ አይሆንም ነበር፡፡

ልጁ በብዙ ወንድሞች መካከል በኵር ይሆን ዘንድ፥ አስቀድሞ ያወቃቸው የልጁን መልክ እንዲመስሉ አስቀድሞ ደግሞ ወስኖአልና፤ አስቀድሞም የወሰናቸውን እነዚህን ደግሞ ጠራቸው፤ የጠራቸውንም እነዚህን ደግሞ አጸደቃቸው፤ ያጸደቃቸውንም እነዚህን ደግሞ አከበራቸው። ሮሜ 8፡29-30

እግዚአብሄር ለሰው ያለውን ክብር ለማሳየት ነው

አንዳንድ ጊዜ አንድን እቃ ለመግዛት እንፈልግና የእቃውን ጥራቱን ለማወቅ እውቀቱ ከሌለን ዋጋውን እናያለን፡፡ ለእቃው የሚጠየቀውን ዋጋ አይተን የእቃውን ጥራት እንገምታለን፡፡ ብዙ ገንዘብ የሚጠየቅለ እቃ ዋጋው ከፍ ያለ ውድ እቃ ነው፡፡ ትንሽ ገንዘብ የሚጠየቅለት እቃ ደግሞ ዋጋው ዝቅ ያለ ርካሽ እቃ ነው፡፡ እኛን ለማዳን የተከፈለውን ዋጋ ስናይ የእኛን ዋጋ እናይበታለን፡፡ የክብራችንን ከፍተኝነት የምናውቅው ከእኛ የተከፈለውን ዋጋ በማየት ነው፡፡

ከአባቶቻችሁ ከወረሳችሁት ከከንቱ ኑሮአችሁ በሚያልፍ ነገር በብር ወይም በወርቅ ሳይሆን፥ ነውርና እድፍ እንደ ሌለው እንደ በግ ደም በክቡር የክርስቶስ ደም እንደ ተዋጃችሁ ታውቃላችሁ። 1ኛ ጴጥሮስ 1፡18-19

እንዲያውም በምድር ላይ በአምላክነት መመላሱ ሳይሆን እንደ እኛ በስጋ መመላለሱን አለማመን ነው ከእምነት የሚያወጣው፡፡

የእግዚአብሔርን መንፈስ በዚህ ታውቃላችሁ፤ ኢየሱስ ክርስቶስ በሥጋ እንደ መጣ የሚታመን መንፈስ ሁሉ ከእግዚአብሔር ነው፥ ኢየሱስ ክርስቶስም በሥጋ እንደ መጣ የማይታመን መንፈስ ሁሉ ከእግዚአብሔር አይደለም፤ ይህም የክርስቶስ ተቃዋሚው መንፈስ ነው፤ ይህም እንዲመጣ ሰምታችኋል፥ አሁንም እንኳ በዓለም አለ። 1ኛ ዮሐንስ 4፡2-3

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ስጋናደም #የልጅነትክብር #ክብር #የልጅነትስልጣን #ሰውነት #ህይወት #ትንሳኤ #ሃይል #ስልጣን #ፋሲካ #ትንሳኤ #ሞት #አማርኛ #ስብከት #መዳን #መፅሃፍቅዱስ #መንፈስቅዱስ  #ፌስቡክ #አቢይዋቁማ #አቢይዋቁማዲንሳ

አማኑኤል – እግዚአብሔር ከእኛ ጋር

shutterstock_182332070.jpgእግዚአብሄር ሰውን ከእርሱ ጋር ፍፁም ህብረት እንዲያደርግ አድርጎ በመልኩና በአምሳሉ ፈጥሮታል፡፡ የእግዚአብሄር አላማ ከሰው ጋር በህብረት መኖር ነበር፡፡

ሰው ግን አታድርግ የተባለውን በማድረጉ በአመፅ ከእግዚአብሔር ተለየ፡፡ ሰው በእግዚአብሄር ላይ በማመፁ ምክኒያት ከእግዚአብሄር ጋር ተቆራረጠ በዚያም ከእግዚአብሄር ጋር የነበረውን የአባትና የልጅ ግንኙነት አጣው፡፡ ሰው ሰይጣንን በመስማቱ በአመፁ የእግዚአብሄር ጠላት ሆነ፡፡

እግዚአብሄር በመልኩና በአምሳሉ የፈጠረው አንድም ሰው እንዲጠፋ አይፈልግም፡፡

ሰዎች ሁሉ ሊድኑና እውነቱን ወደ ማወቅ ሊደርሱ በሚወድ በእግዚአብሔር በመድኃኒታችን ፊት መልካምና ደስ የሚያሰኝ ይህ ነው። 1ኛ ጢሞቴዎስ 2፡3-4

ስለዚህ እግዚአብሄር ሰውን ለመፈለግ ስጋ ለብሶ ወረደ፡፡ ኢየሱስ በእግዚአብሄር መልክ ሲኖር እኛን ሰዎችን ለመፈለግ ስጋ ለብሶ ወደ ምድር መጣ፡፡

ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። በነቢይ ከጌታ ዘንድ፦ እነሆ፥ ድንግል ትፀንሳለች ልጅም ትወልዳለች፥ ስሙንም አማኑኤል ይሉታል የተባለው ይፈጸም ዘንድ ይህ ሁሉ ሆኖአል፥ ትርጓሜውም፦ እግዚአብሔር ከእኛ ጋር የሚል ነው። ማቴዎስ 1፡21-23

እርሱ በእግዚአብሔር መልክ ሲኖር ሳለ ከእግዚአብሔር ጋር መተካከልን መቀማት እንደሚገባ ነገር አልቈጠረውም፥ ነገር ግን የባሪያን መልክ ይዞ በሰውም ምሳሌ ሆኖ ራሱን ባዶ አደረገ፥ በምስሉም እንደ ሰው ተገኝቶ ራሱን አዋረደ፥ ለሞትም ይኸውም የመስቀል ሞት እንኳ የታዘዘ ሆነ። ፊልጵስዩስ 2፡5-7

ቃልም ሥጋ ሆነ፤ ጸጋንና እውነትንም ተመልቶ በእኛ አደረ፥ ዮሃንስ 1፡14

ኢየሱስ እኛን ሰዎችን መስሎ የመጣው ለእኛ ያለውን ፍቅር ሊገልፅልንና ከሰው ጋረ የነበረውን የተበላሸ ህብረት ለማደስ የሚያስፈልገውን የሃጢያታችንን ዋጋ በመሞት ሊከፍልልን ነው፡፡

በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና። ዮሃንስ 3፡16

እግዚአብሄር በኢየሱስ በመካከላችን ቢያድርም ኢየሱስ በመስቀል ላይ የሰራው ስራ ለእኔ ነው ብለን እስካልተቀበለን ድረስ ኢየሱስ ወደ ምድር የመጣበትና የእኛን ስጋ ለብሶ የተመላለሰበትን ብሎም ስለሃጢያታችን የሞተበትን አላማ እንስተዋለን፡፡

ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ ዮሃንስ 1፡12

ኢየሱስ ጌታ እንደ ሆነ በአፍህ ብትመሰክር እግዚአብሔርም ከሙታን እንዳስነሣው በልብህ ብታምን ትድናለህና፤ ሰው በልቡ አምኖ ይጸድቃልና በአፉም መስክሮ ይድናልና። ሮሜ 10፡9-10

የንስሃ ፀሎት

እግዚአብሄር ሆይ ስለሃጢያቴ እንዲሞት ልጅህን ኢየሱስን ወደምድር ስለላከው አመሰግንሃለሁ፡፡ እግዚአብሄር ሆይ እኔ ሃጢያተኛ ነኝ፡፡ በሃጢያቴ ምክኒያት ለዘላለም ከአንተ መለየት አልፈልግም፡፡ እኔ ከአንት ለዘላለም እንዳልለያይ ኢየሱስ በመስቀል ላይ የሰራለኝን ስራ ለእኔ ነው ብዬ እቀበላለሁ፡፡ ኢየሱስ እንደሞተልኝና ከሙታን እንደተናሳ አምናለሁ፡፡ ኢየሱስ ጌታ እንደሆነ በአፌ እመሰክራለሁ፡፡ ኢየሱስ ጌታ ነው፡፡ ልጅ አድርገህ ስለተቀበልከኝ አመሰግንሃለሁ፡፡ አሜን

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #እምነት #መናገር #አማርኛ #ስብከት #መዳን #መፅሃፍቅዱስ #ልብ #እምነት #ቃል #መዳን #ማድረግ #መስዋእት #ደስታ #አቢይ #አቢይዋቁማ #አቢይዋቁማዲንሳ #እወጃ #መናገር #ፅናት #ትግስት #መሪ

በበረት የተወለደው ኢየሱስ በልባችን ካልተወለደ አይጠቅመንም

jesus born.jpgእግዚአብሄር ሰውን ሁሉ ፈጥሮታል፡፡ ሰው ሁሉ በሃጢያት ወድቋል፡፡ ሁሉም ሰው የእግዚአብሄር ፍጥረት ነው፡፡ ሁሉም ሰው ግን የእግዚአብሄር ልጅ አይደለም፡፡ ወይም ኢየሱስ ስለሰዎች ሁሉ በመስቀል ላይ ሊሞት በምድር ላይ ስለተወለደ ብቻ ሰው ሁሉ ከመቀፅበት የእግዚአብሄር ልጅ አይሆንም፡፡ የብቻ ሰውር ልጅ ለመሆን መመዘኛ አለው፡፡ ለእግዚአብሄር ፍጥረት ሁሉ የእግዚአብሄር ልጅ ለመሆን ብቸኛው መመዘኛ ኢየሱስን መቀበል ነው፡፡

ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ ዮሃንስ 1፡12

በበረት የተወለደው ኢየሱስ በልባችን ካልተወለደ አይጠቅመንም፡፡ ሃይማኖተኛ ልንሆን እንችላለን፡፡ ብዙ ነገሮችን ለእግዚአብሄር ብለን ልናደርግ እንችላለን፡፡ ኢየሱስ በመስቀል ላይ የሰራልንን ለእኔ ነው ብለን ኢየሱስን በመቀበል ዳግመኛ ካልተወለድን ግን የኢየሱስ በምድር ላይ መወለድ አይጠቅመንም፡፡ ኢየሱስን ያደንቀው ለነበረ ኒቆዲሞስ ለተባለ የህግ መምህር ኢየሱስ ያለው ይህንን ነው፡፡

ኢየሱስም መልሶ፦ እውነት እውነት እልሃለሁ፥ ሰው ዳግመኛ ካልተወለደ በቀር የእግዚአብሔርን መንግሥት ሊያይ አይችልም አለው። ኢየሱስም መለሰ፥ እንዲህ ሲል፦ እውነት እውነት እልሃለሁ፥ ሰው ከውኃና ከመንፈስ ካልተወለደ በቀር ወደ እግዚአብሔር መንግሥት ሊገባ አይችልም። ዮሃንስ 3፡3፣5

በተለያዩ ሃይማኖታዊ ስርአቶች ገናን በፍቅር ልናከብረው እንችላለን፡፡ ኢየሱስን ከልባችን ልናደንቀው እንችላለን፡፡ ነገር ግን ኢየሱስ በልባችን ካልኖረ ወደ ምድር የመጣበትንና ከድንግል ማርያም የተወለደበትን አላማ ስተነዋል፡፡

ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። ዮሃንስ 1፡21

ኢየሱስ በምድር ላይ ስለተወለደ ብቻ ከመቀፅበት አንድንም፡፡ ኢየሱስ ስለተወለደ ብቻ ሰዎች ከመቀፅበት የሚድኑ ቢሆን ኖሮ ኢየሱስ ለፍጥረት ሁሉ ወንጌልን ስበኩ ብሎ ባላዘዘን ነበር፡፡ የምስራቹን ቃል ሰምተው የሚያምኑ ብቻ ናቸው የሚድኑት፡፡

እንዲህም አላቸው፦ ወደ ዓለም ሁሉ ሂዱ ወንጌልንም ለፍጥረት ሁሉ ስበኩ። ያመነ የተጠመቀም ይድናል፥ ያላመነ ግን ይፈረድበታል። ማርቆስ 16፡15-16

የሚድኑት ኢየሱስን እንደ አዳኝ የተቀበሉ ሰዎች ብቻ ናቸው፡፡ የምንም ሃይማኖት ተከታዮች ስለሆንን ብቻ አንድንም፡፡ ከሃጢያት የሚያድነን ኢየሱስን እንደ አዳኝና ጌታ አድርገን መቀበላችን ብቻ ነው፡፡

በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና። ዮሃንስ 3፡16

ሰዎች በየእለቱና በየደቂቃው ኢየሱስን እየተቀበሉና እየዳኑ ነው፡፡ እኛ ግን ኢየሱስን ወደ ልባችን ሳናስባውና በልባችን ሳይወለድ ኢየሱስ በምድር ላይ ስለተወለደ ብቻ ድነናል ብለን ካሰብን ተታለናል፡፡ የኢየሱስ መወለድ እንዲጠቅመን ወንጌልን ማመን ይጠበቅብናል፡፡ የሚያድነን የእግዚአብሄር ሃይል የኢየሱስ ስለሃጢያታችን መሞቱን የምስራች ማመን ነው፡፡

በወንጌል አላፍርምና፤ አስቀድሞ ለአይሁዳዊ ደግሞም ለግሪክ ሰው፥ ለሚያምኑ ሁሉ የእግዚአብሔር ኃይል ለማዳን ነውና። ሮሜ 1፡16

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እምነት #ወንጌል #ስብከት #ቃል #ገና #ልብ #ዳግመኛመወለድ #የማዳንሃይል #የእግዚአብሄርሃይል #መንፈስቅዱስ #ቃሉንመስማት #እወጃ #ቤተክርስትያን #አማርኛ #ስብከት #መዳን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ

ለሕዝቡ ሁሉ የሚሆን ታላቅ ደስታ የምሥራች

gie5qj78T.jpgመልአኩም እንዲህ አላቸው፦ እነሆ፥ ለሕዝቡ ሁሉ የሚሆን ታላቅ ደስታ የምሥራች እነግራችኋለሁና አትፍሩ፤ ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና። ይህም ምልክት ይሆንላችኋል፤ ሕፃን ተጠቅልሎ በግርግምም ተኝቶ ታገኛላችሁ። ድንገትም ብዙ የሰማይ ሠራዊት ከመልአኩ ጋር ነበሩ። እግዚአብሔርንም እያመሰገኑ፦ ክብር ለእግዚአብሔር በአርያም ይሁን ሰላምም በምድር ለሰውም በጎ ፈቃድ አሉ። ሉቃስ 2፡10-14

ለሕዝቡ ሁሉ የሚሆን

ኢየሱስ የተወለደው ለህዝብ ሁሉ ነው፡፡ ኢየሰስ የተወለደው ለፍጥረት ሁሉ ነው፡፡ ኢየሱስ የመጣው ከሴት ለተወለደ ሰው ሁሉ ነው፡፡

ታላቅ ደስታ የምሥራች

የኢየሱስ መወለድ የምስራች ነው፡፡ የኢየሱስ መወለድ መልካም ዜና ነው፡፡

መልካሙን የምሥራች የሚያወሩ እግሮቻቸው እንዴት ያማሩ ናቸው ተብሎ እንደ ተጻፈ ካልተላኩ እንዴት ይሰብካሉ? ሮሜ 10፡15

አትፍሩ

የኢየሱስ መወለድ የሰውና የእግዚአብሄር መታረቅ የመጀመሪያው ደረጃ ነው፡፡ የኢየሱስ መወለድ የኢየሱስ መወለድ ድስ ይምንሰኝበት ዘና የምንልበት እንጂ የምንፈራበት አይደለም፡፡ ፍርሃት ነግሶ ከነበረ ፍርሃት ከዚህ በኋላ አይኖርም፡፡

በእርሱም ከጠላቶቻችን እጅ ድነን በዘመናችን ሁሉ ያለ ፍርሃት በቅድስናና በጽድቅ በፊቱ እንድናገለግለው ሰጠን። ሉቃስ 1፡74-75

ክርስቶስ ጌታ የሆነ ተወልዶላችኋልና

የተቀባ አዳኝ ጌታ የሆነ ኢየሱስ ተወልዶልናል፡፡

ክብር ለእግዚአብሔር

ሰው በእግዚአብሄር ክብር ተፈጥሯል፡፡ ሰዊች ኢየሱስን በመቀበል የእግዚአብሄ ልጆች ይሆናለሁ ወደ ልጅነት ክብራቸው ይመለሳሉ፡፡ ሰዎች ኢየሱስን ሲቀበሉ እግዚአብሄርን ማከበር ይችላሉ፡፡ ለእግዚአብሄር የሚገባውን ክብር መስጠት የሚችለው ሰው ኢየሱስን በመጀመሪያ በመቀበሉ ነው፡፡

ዳግመኛ የተወለዳችሁት ከሚጠፋ ዘር አይደለም፥ በሕያውና ለዘላለም በሚኖር በእግዚአብሔር ቃል ከማይጠፋ ዘር ነው እንጂ። 1ኛ ጴጥሮስ 1፡23

ሰላምም በምድር

ሰው እውነተኛ ሰላምን የሚለማመደው በኢየሱስ ነው፡፡ በኢየሱስ ያለውን ሰላም ያላየ ሰው እውነተኛውን ሰላም ገና አላየም፡፡ ኢየሱስ የሚሰጠውቅ ሰላም አለም እንደሚሰጠው አይደለም፡፡

ሰላምን እተውላችኋለሁ፥ ሰላሜን እሰጣችኋለሁ፤ እኔ የምሰጣችሁ ዓለም እንደሚሰጥ አይደለም። ልባችሁ አይታወክ አይፍራም። ዮሃነስ 14፡27

ለሰውም በጎ ፈቃድ

እግዚአብሄር ለሰዎች ያለውን በጎ ፈቃድ ያሳየው በኢየሱስ ነው፡፡ ሰው ሁሉ እረኛ እንደሌለው በግ ተቅበዝብዞ ጠፍቶ በነበረበት ጊዜ እግዚአብሄር ኢየሱስን ላከልን፡፡ የእግዚአብሄር በጎ ፈቃድ የተገለጠው በኢየሱስ መወለድ ነው፡፡ እግዚአብሄር ለሰዎች ያለውን ርህራሄና ልብ ያየነው በኢየሱስ መወለድ ነው፡፡

ነገር ግን ገና ኃጢአተኞች ሳለን ክርስቶስ ስለ እኛ ሞቶአልና እግዚአብሔር ለእኛ ያለውን የራሱን ፍቅር ያስረዳል። ሮሜ 5፡8

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #መወለድ #ገና #ክሪስማስ #ማማጥ #ቤተክርስትያን #አማርኛ #ጥሪ #አላማ #መፅሃፍቅዱስ #ሰላም #አቢይ #አቢይዋቁማ #አቢይዋቁማዲንሳ #አትፍሩ #የምስራች #ደስታ #ክብር #ሰላም #በጎፈቃድ

መልካም ስራን መስራት ለመዳን ለምን አይጠቅምም?

murder-7593.jpgብዙ ሰዎች ለመዳን በመልካም ስራቸው ላይ ይደገፋሉ፡፡ መዳንን ሲያስቡ መልካም ስራዬ ያድነኝ ይሆንን ብለው ስለመልካም ስራቸው ጥንካሬ ይጨነቃሉ፡፡ መልካም ስራ መስራት እንደማያድን እና ሰው ለመዳን መልካም ስራ እንደሚያስፈገው ከእግዚአብሄር ቃል እንመልከት፡፡

እግዚአብሄር ሰውን የፈጠረው በመልኩና በአምሳሉ ነው፡፡ እግዚአብሄር ከሰው ጋር ህብረት ማድረግ እንዲችል ሰውን በመልኩ ፈጠረው፡፡ ሰው የተፈጠረው ወደ እግዚአብሄር ቤተሰብ ውስጥ ነበር ፡፡

እግዚአብሄር ለዘላለም ከእርሱ ጋር እንዲኖር አስቦ ነው ሰውን የፈጠረው፡፡ እግዚአብሄር ሰውን የፈጠረው ከእርሱ ጋር ለዘላለም እንዲኖር ፣ ከእርሱ ጋር ህብረት እንዲያደርግና እንዲታዘዘው ነበር፡፡ ለዚህም ነው እግዚአብሄር ሰውን እንዲታዘዘው ያዘዘው በእርሱ ላይ ባመፀ ጊዜ እንደሚሞት ያስጠነቀቀው፡፡ ሰው እግዚአብሄርን ባልታዘዘ በዚያው ቅፅበት ሞተ፡፡ ሰው የተፈጠረበትን አላማ ሳተ፡፡ ሰው በአመፁ ከእግዚአብሄር ጋር የነበረው የአባትና የልጅነት ግንኙነት ተቋረጠ፡፡ ሰው ከእግዚአብሄር ጋር ተቆራረጠ፡፡ ሰው በራሱ ሆነ፡፡ ሰው ከእግዚአብሔር ጋር ጠላት ሆነ፡፡

ስለዚህ ምክኒያት ምንም አይነት ለመዳን ወይም ለመጽደቅ የሚደረግ መልካም ስራ ሊያፀድቅ የማይችልበትን ምክኒያቶች እንመልከት፡፡

  1. ሰው ከእግዚአብሄር ክብር ወድቆዋል

በእግዚአብሄር መልክና አምሳል በእግዚአብሄር ክብር ተፈጥሮ ነበር፡፡

እግዚአብሔርም ሰውን በመልኩ ፈጠረ፤ በእግዚአብሔር መልክ ፈጠረው፤ ወንድና ሴት አድርጎ ፈጠራቸው። ዘፍጥረት 2፡27

ሰው ሃጢያትን ሲሰራ ከለእግዚአብሄር ክብር ወድቆዋል፡፡ ሰው ሃጢያትን ሲሰራ የእግዚአብሄን መልክ አጥቶታል፡፡ ሰው ሃጢያት በመሰራቱ ከእግዚአብሄር ክብር ጎድሎዋል፡፡

ሁሉ ኃጢአትን ሠርተዋልና የእግዚአብሔርም ክብር ጎድሎአቸዋል፤ ሮሜ 3፡23

ሰው ሃጢያት ሲሰራ ከእግዚአብሄ ክብርት ደረጃ ወደ ሳርነትና አባባነት ደረጃ ተዋርዶዋል፡፡ እግዚአብሄር በክብሩ የፈጠረው ሰው ከወደቀ በኋላ በሳርነትና በአበባነት ክብር የሚሰራው ስራ እግዚአብሄርን አያስደስተውም፡፡ እግዚአብሄር የአመፀኛ ምንም አይነት ስራ አያስደስተውም፡፡

ሥጋ ሁሉ እንደ ሣር ክብሩም ሁሉ እንደ ሣር አበባ ነውና፤ ሣሩ ይጠወልጋል አበባውም ይረግፋል፤ 1ኛ ጴጥሮስ 1፡24

  1. ሰው ሃጢያት ሲሰራ ከእግዚአብሄር ቤተሰብ አባልነት ወጥቶዋል፡፡

እግዚአብሄር ሰውን የፈጠረው ለህብረት ነው፡፡ እግዚአብሄር ሰውን በመጀመሪያ የፈጠረው ለህብረት እንጂ ለስራ አይደለም፡፡ ሰው ወደ እግዚአብሄ ቤተሰብ ውስጥ ተፈጥሮዋል፡፡ ሰው የእግዚአብሄር ወንድና ሴት ልጅ እንዲሆን ተፈጥሮዋል፡፡ ሰው ከእግዚአብሄር ጋር የአባትና የልጅ ግንኘኙነት እንዲኖረው ተፈጥሮዋል፡፡ ሰው ከእግዚአብሄር ጋር ያለው የአባትና የልጅ ግንኙነት ሲቋረጥ ሰው አጣ፡፡ ሰው ከእግዚአብሄር ጋር የነበረው ግንኙነት በሃጢያት ምክኒያት ሲቋረጥ ሰው እግዚአብሄርን የሚመስልበትን ባህሪ አጣው፡፡ እግዚአብሄር ያለመውን ህብረትና ግንኙነት ከሰው ሊያገኝ አልቻለም፡፡ ሰው የእግዚአብሄርን ሳይሆን ሰይጣንን በመስማቱ መልካም ባህሪ አጥቶ የሰይጣንን ባህሪ ተካፈለ፡፡

እናንተ ከአባታችሁ ከዲያብሎስ ናችሁ የአባታችሁንም ምኞት ልታደርጉ ትወዳላችሁ። እርሱ ከመጀመሪያ ነፍሰ ገዳይ ነበረ፤ እውነትም በእርሱ ስለ ሌለ በእውነት አልቆመም። ሐሰትን ሲናገር ከራሱ ይናገራል፥ ሐሰተኛ የሐሰትም አባት ነውና። ዮሃንስ 8፡44

ከእግዚአብሄር ጋር ያለውን የልጅነት ግንኙነት ያቋረጠውና የእግዚአብሄን ባህሪ ያጣው ሰው  በመልካም ስራ እግዚአብሄርን ሊያስደስተው አይችልም፡፡ እግዚአብሄር የሚፈልገው ስራውን ሳይሆን ግንኙነቱና የራሱን ባህሪ በሰው ውስጥ ማየቱን ነው፡፡ ግንኙነቱንና ህብረቱን አቋርጦ ባህሪውን ጥሎ ስራውን ልስራ የሚል ሰው እግዚአብሄርን አይማርከውም፡፡

  1. ሰው አላማውን ስቶዋል፡፡

ሰው የተፈጠረው ለእግዚአብሄር ክብር ነው፡፡ ሰው የተፈጠረው እግዚአብሄርን እየሰማና እየታዘዘ እንዲኖር ነው፡፡ ሰው ሃጢያት ሲሰራ የተፈጠረበትን አላማውን ሁሉ ስቶዋል፡፡ ሰው የተፈጠረው መልካም በሚላቸው ነገሮች እግዚአብሄርን እንዲያስደስት አይደለም፡፡ ሰው የተሰራው ከእግዚአብሄር ጋር ህብረት በማድረግ እግዚአብሔር የሚፈልገውን ነገር እንዲያደርግ ነው፡፡ ስለዚህ የተፈጠረበትን የህብረት አላማ የሳተ ሰው በራሱ አነሳሽነት ነገሮችን በማድረግ እግዚአብሄርን ሊያስደስተው አይችልም፡፡

በሥጋ ያሉትም እግዚአብሔርን ደስ ሊያሰኙት አይችሉም። ሮሜ 8፡8

  1. ሰው በሃጢያቱ ምክኒያት ሞቶዋል፡፡

ሰው የተፈጠረው በእግዚአብሄር ዘንድ ህያው ሆኖ ከእግዚአብሄር ጋር ህብረት እያደረገ ለዘላለም እንዲኖር ነው፡፡ ሰው በሃጢያት ምክኒያት ከእግዚአብሄር ጋር የነበረው የአባትነትና የልጅነት ግንኙነት ሲቋረጥ ሞተ፡፡ ንስሃ ያልገባና ኢየሱስን ያልተቀበለ በሃጢያት የሚኖር ሰው በእግዚአብሄር አይን ሙት ነው፡፡ ኢየሱስን የማይከተል ሰው ሰው ለእግዚአብሄር ህያው አይደለም፡፡ ሃጢያተኛ ሰው ይበላል ይጠጣል ይንቀሳቀሳል በእግዚአብሄር አይን ግን ሙት ነው፡፡ የሰው መንፈሱ ሞቶዋል፡፡ ሰው ከእግዚአብሄር ጋር የሚገናኝበት የመንፈስ ክፍሉ ሞቶዋል፡፡ የሞተ ወይም የተለየ ሰው ማንንም ማስደሰት እንደማይችል ሁሉ ሃጢያተኛ ሰው እግዚአብሄርን በመልካም ስራ በፅድቁ ሊያስደስተው አይችልም፡፡

በበደላችሁና በኃጢአታችሁ ሙታን ነበራችሁ፤ በእነርሱም፥ በዚህ ዓለም እንዳለው ኑሮ፥ በማይታዘዙትም ልጆች ላይ አሁን ለሚሠራው መንፈስ አለቃ እንደ ሆነው በአየር ላይ ሥልጣን እንዳለው አለቃ ፈቃድ፥ በፊት ተመላለሳችሁባቸው። ኤፌሶን  2፡1-2

ሁላችን እንደ ርኩስ ሰው ሆነናል፥ ጽድቃችንም ሁሉ እንደ መርገም ጨርቅ ነው፤ ሁላችንም እንደ ቅጠል ረግፈናል፥ በደላችንም እንደ ነፋስ ወስዶናል። ኢሳያስ 64፡6

  1. ሰው በሰይጣን ግዛት ውስጥ ውድቆዋል

ሰው እግዚአብሄርን እንቢ ሲል ሰይጣንን እሺ ብሎዋል፡፡ ሰው ለፈጠረው ለእግዚአብሄር ካልተገዛ ለሰይጣን ይገዛል፡፡ ሰው ወይ የኢየሱስ ተከታይ ይሆናል ወይም የሰይጣን ተከታይ ይሆናል፡፡ ከሁለቱም መካከል ነኝ የሚል ሰው የለም፡፡ ሰው በንስሃ ኢየሱስን ካልተቀበለ በሰይጣን ግዛት ውስጥ እያለ ኢየሱስን ሊያገለግል መልካምን ስራ ሊሰራ አይችልም፡፡  ሰው መልካምን ለመስራት መጀመሪያ ከተያዘበት ከዲያቢሎስ ግዛት ነፃ መውጣት አለበት፡፡

በበደላችሁና በኃጢአታችሁ ሙታን ነበራችሁ፤ በእነርሱም፥ በዚህ ዓለም እንዳለው ኑሮ፥ በማይታዘዙትም ልጆች ላይ አሁን ለሚሠራው መንፈስ አለቃ እንደ ሆነው በአየር ላይ ሥልጣን እንዳለው አለቃ ፈቃድ፥ በፊት ተመላለሳችሁባቸው። ኤፌሶን  2፡1-2

እርሱ ከጨለማ ሥልጣን አዳነን፥ ቤዛነቱንም እርሱንም የኃጢአትን ስርየት ወዳገኘንበት ወደ ፍቅሩ ልጅ መንግሥት አፈለሰን። ቆላስይስ 1፡13-14

  1. ሰው በሃጢያት ምክኒያት ከእግዚአብሄር ጋር ጠላት ሆኖዋል፡፡

ሰው እግዚአብሄር አታድርግ ያለውን በማድረጉ በእግዚአብሄር ላይ አምፆአል፡፡ ስለዚህ አመፀኛ የሆነ ሰው ላመፀበት መልካምን ነገር ከማድረጉ በፊት ከአመፁ ንስሃ መግባት አለበት፡፡ ከአመፁ ንስሃ ሳይገባና ሳይመለስ ከእግዚአብሄር ጋር ሳይታረቅ በጠላትነት የሚያደርገው መልካም ስራ ሁሉ ለመዳን በእግዚአብሄር ዘንድ ተቀባይነት የለውም፡፡ ሰው መልካመነ ስራ ከመስራቱ በፊት መታረቅ ግዴታ ነው፡፡

ጠላቶች ሳለን ከእግዚአብሔር ጋር በልጁ ሞት ከታረቅን፥ ይልቁንም ከታረቅን በኋላ በሕይወቱ እንድናለን፤ ሮሜ 5፡10

መልካምን ስራ መስራት ምንም ጉዳት የለውን ለመፅደቅ ወይም ለመዳን ግን አይጠቅምም፡፡ ሰው የሚድነው ኢየሱስ በመስቀል ላይ የሰራለትን ስራ ለእኔ ነው ብሎ በእምነት ሲቀበል ነው፡፡ መልካምን ስራ ለመስራት ከሞተ ስራ ንስሃ መግባትና እንደገና መመለድ ይጠይቃል፡፡ ኢየሱስን የተቀበለ ሰው ሁሉ መልካምን መስራት አለበት፡፡ ነገር ግን መልካምን የሚሰራው ለመዳን ሳይሆን ስለዳነ ነው፡፡

እኛ ፍጥረቱ ነንና፤ እንመላለስበት ዘንድ እግዚአብሔር አስቀድሞ ያዘጋጀውን መልካሙን ሥራ ለማድረግ በክርስቶስ ኢየሱስ ተፈጠርን። ኤፌሶን 2፡10

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ልጅነት #ደህንነት #መልካምስራ #መልካምምግባር #ሞት #አላማመሳት #ሐጢያት #አማርኛ #ስብከት #መዳን #መፅሃፍቅዱስ #ቃል #ፍጥረት #ልጅነት #ስራ #እምነት #አምባሳደር #ብርሃን #ጨው #ልጅነት #አቢይ #አቢይዋቁማ #አቢይዋቁማዲንሳ

ኢየሱስን ተመልክተን

focus.jpgእንግዲህ እነዚህን የሚያህሉ ምስክሮች እንደ ደመና በዙሪያችን ካሉልን፥ እኛ ደግሞ ሸክምን ሁሉ ቶሎም የሚከበንን ኃጢአት አስወግደን፥ የእምነታችንንም ራስና ፈጻሚውን ኢየሱስን ተመልክተን፥ በፊታችን ያለውን ሩጫ በትዕግሥት እንሩጥ፤ እርሱ ነውርን ንቆ በፊቱም ስላለው ደስታ በመስቀል ታግሦ በእግዚአብሔር ዙፋን ቀኝ ተቀምጦአልና። ዕብራውያን 12፡1-2

ሰው ሊሰራ የሚችለው ነገር ከእግዚአብሄር እንደተሰጠው ስጦታ መጠን ብቻ ነው፡፡ ከጥሪያችን አልፎ ለብክነት የሚተርፍ ነገር አልተሰጠንም፡፡ ስለዚህ ነው በክርስትና ህይወት ትኩረት ወሳኝ ነገር የሆነው፡፡ ሰው ውስን ስለሆነ ትኩረት ሊያደርግ በትክክል ሊሰራ የሚችለው አንድ ነገር ብቻ ነው፡፡ ሰው ከአንድ ነገር በላይ ላይ ትኩረት ለማድረግ ከሞከረ በአንዱም ነገር ላይ ትኩረት ማድረግ ስለሚያቅተው በምንም ነገር ላይ ውጤታማ ሳይሆ ይቀራል፡፡

ትኩረታችንን የሚፈልጉ ብዙ ነገሮች አሉ፡፡ ብዙ ነገሮች ወደእኔ ተመልከት እኔን ካላገኘኸኝ ወዮልህ በማለት ሊያስፈራሩን ይሞክራሉ፡፡ ትኩረታችንን ከምንም ነገር ላይ አንስተን እነርሱ ላይ እንድናደርግ የሚገፋፉ ብዙ ነገሮች አሉ፡፡

እርሱም፦ ና አለው። ጴጥሮስም ከታንኳይቱ ወርዶ ወደ ኢየሱስ ሊደርስ በውኃው ላይ ሄደ። ነገር ግን የነፋሱን ኃይል አይቶ ፈራ፥ ሊሰጥምም በጀመረ ጊዜ፦ ጌታ ሆይ፥ አድነኝ ብሎ ጮኸ። ማቴዎስ 14፡29-30

ጴጥሮስ ኢየሱስ በውሃ ላይ ሲራመድ አይቶ ልምጣ ብሎ ጠየቀ፡፡ ኢየሱስም ና ባለው ጊዜ ጴጥሮስ ከታንኳይቱ ወርዶ ወደ ኢየሱስ ሊደርስ በውሃ ላይ ሄደ፡፡ ነገር ግን ጴጥሮስ አይኑን ከኢየሱስ ላይ አንስቶ ውሃው ወጀቡ ላይ ባደረገ ጊዜ መስመጥ ጀመረ፡፡

ስለዚህ ነው መፅሃፍ ቅዱስ አበክሮ ኢየሱስ ላይ ማተኮር እንዳለብን የሚናገረው፡፡ ከኢየሱስ ውጭ ያሉ ነገሮች ሁሉ አስተማማኝ አይደሉም፡፡ መፅሃፍ ቅዱስ የሚታየው ሁሉ ሃላፊ እንደሆነ ይናገራል፡፡ ሁሉም ነገር እያለፈ ያለ ነው፡፡ ለዘላለም የሚኖረው ኢየሱስ የእግዚአብሄር ቃል ነው፡፡ ሁሉም ነገር አላፊ ነው፡፡

የማይታየውን እንጂ የሚታየውን ባንመለከት፥ ቀላል የሆነ የጊዜው መከራችን የክብርን የዘላለም ብዛት ከሁሉ መጠን ይልቅ ያደርግልናልና፤ የሚታየው የጊዜው ነውና፥ የማይታየው ግን የዘላለም ነው። 2ኛ ቆሮንቶስ 4፡17-18

ኢየሱስን ስናይ እንበረታለን፡፡ አካባቢያችንን ካየን የሚያደክሙ ብዙ ነገሮች በዙሪያችን አሉ፡፡ አለም በሃጢያት የተበላሸ እንደመሆኑ መጠን ከአለም ፍፁምነት መጠበቅ አንችልም፡፡  ከእግዚአብሄር ውጭ ራሳችንን ስናይ ተስፋ እንቆርጣለን፡፡ ኢየሱስን ስናይ ተስፋችን ይታደሳል ሃይልም ይሆንልናል፡፡ ኢየሰሱስን ስናይ ተስፋ በሌለው ነገር ላይ ተስፋችን ይለመልማል፡፡

የሚያለቅሱም እንደማያለቅሱ፥ ደስ የሚላቸውም ደስ እንደማይላቸው፥ የሚገዙም ምንም እንደሌላቸው፥ በዚችም ዓለም የሚጠቀሙ በሙሉ እንደማይጠቀሙባት ይሁኑ፤ የዚች ዓለም መልክ አላፊ ነውና። 1ኛ ቆሮንቶስ 7፡30-31

አካባቢያችን ላይ ካተኮርን ብዙ የሚያስፈራራ ነገር አለ፡፡ ኢየሱስን ስናይ ግን ኢየሱስ አለምን ስላሸነፈ እንፅናናለን፡፡ በኑሮ ላይ ካተኮርን በቁማችን ሊውጠን ዝግጁ ነው፡፡ ኢየሱስን ካየን ግን በቃኝ ብለን እግዚአብሄርን አገልግለን እናልፋለን፡፡

በእሾህ መካከልም የወደቀ እነዚህ የሚሰሙት ናቸው፤ መንገዳቸውንም ሄደው በሕይወት ዘመን በአሳብና በባለ ጠግነት ምቾት ይታነቃሉ፥ ሙሉ ፍሬም አያፈሩም። ሉቃስ 8:14

በእኔ ሳላችሁ ሰላም እንዲሆንላችሁ ይህን ተናግሬአችኋለሁ። በዓለም ሳላችሁ መከራ አለባችሁ፤ ነገር ግን አይዞአችሁ፤ እኔ ዓለምን አሸንፌዋለሁ። ዮሃንስ 16፡33

አካባቢያችንን ስናይ እናዝናለን፡፡ ሁኔታዎችን ስናይ ምቾት አይሰማንም፡፡ ኢየሱስን ስናይ የስጋችንን ድካም ረስተን በእርሱ እንበረታለን፡፡ ኢየሱስን ስናይ በአካባቢያችን ጨለማ ላይ ብርሃን ይበራበታል፡፡ ተስፋችን ይታደሳል፡፡

ለእነርሱም እግዚአብሔር በአሕዛብ ዘንድ ያለው የዚህ ምሥጢር ክብር ባለ ጠግነት ምን እንደ ሆነ ሊያስታውቅ ወደደ፥ ምሥጢሩም የክብር ተስፋ ያለው ክርስቶስ በእናንተ ዘንድ መሆኑ ነው። ቆላስይስ 1፡27

ኢየሱስን ስናይ ከወደቅንበት እንነሳለን፡፡ ኢየሱስን ስናይ የአለምን መከራና ነውር እንንቃለን፡፡ ኢየሱስን ላይ ስናተኩር የጊዜውን መከራ ሳይሆን የዘላለምን ክብር ላይ እናተኩራለን፡፡ ኢየሱስን ስናይ በህይወት ውጤታማ እንደምንሆን እናምናለን፡፡

በሃይማኖት ብትኖሩ ራሳችሁን መርምሩ፤ ራሳችሁን ፈትኑ፤ ወይስ ምናልባት የማትበቁ ባትሆኑ፥ ኢየሱስ ክርስቶስ በእናንተ ውስጥ እንዳለ ስለ እናንተ አታውቁምን? 2ኛ ቆሮንቶስ 13፡5

በምድር ላይ ትርጉም ያለው ነገር ካደረግን የምናደርገው በራሳችን ሳይሆን በኢየሱስ ነው፡፡

እኔ የወይን ግንድ ነኝ እናንተም ቅርንጫፎች ናችሁ። ያለ እኔ ምንም ልታደርጉ አትችሉምና በእኔ የሚኖር እኔም በእርሱ፥ እርሱ ብዙ ፍሬ ያፈራል። ዮሃንስ 15፡5

የእምነታችንንም ራስና ፈጻሚውን ኢየሱስን ተመልክተን፥ በፊታችን ያለውን ሩጫ በትዕግሥት እንሩጥ፤ ዕብራውያን 12፡2

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ጌታ #ተመልክተን #እይታ #አማርኛ #ስብከት #መዳን #መፅሃፍቅዱስ #ቃል #አሸናፊ #አማልክት #የእግዚአብሄርእቅድ #የእግዚአብሄርፈቃድ #አቢይ #አቢይዋቁማ #አቢይዋቁማዲንሳ

ኢየሱስን መምሰል የመጨረሻው የህይወት ግብ

foot steps.jpgእግዚአብሄር የፈጠረን በመልኩና በአምሳሉ ነው፡፡ የእግዚአብሄር መልክ ከሰው ውስጥ የጠፋው ሰው በሃጢያት ወደቀበት ጊዜ ነው፡፡ ኢየሱስ ወደ ምድር መጥቶ የሃጢያታችንን ሁሉ እዳ የከፈለው ወደ እግዚአብሄር መልክና አምሳል አንድንመለስ ነው፡፡የሰው ልጅ በምድር ላይ የመጨረሻው ግንብ ኢየሱስን መምሰል ነው፡፡ ለክርስቶስ ተከታይ ኢየሱስን ከመምሰል ያለፈ ግብ የለም፡፡

የእግዚአብሄር አላማ እኛ ኢየሱስን እንድመስል ነው፡፡

ልጁ በብዙ ወንድሞች መካከል በኵር ይሆን ዘንድ፥ አስቀድሞ ያወቃቸው የልጁን መልክ እንዲመስሉ አስቀድሞ ደግሞ ወስኖአልና፤ ሮሜ 8፡29

ከአስተሳሰባችን ጀምሮ ክርስቶስን አንድመስል ተጠርተናል፡፡

በክርስቶስ ኢየሱስ የነበረ ይህ አሳብ በእናንተ ዘንድ ደግሞ ይሁን። ፊልጵስዩስ 2፡5

ኢየሱስ በምድር አገልግሎቱ እርሱን በፍፁም አንድንከተል ምሳሌ ትቶልናል፡፡

እኔ ለእናንተ እንዳደረግሁ እናንተ ደግሞ ታደርጉ ዘንድ ምሳሌ ሰጥቻችኋለሁና። ዮሃንስ 13፡15

የክርስትያንነት መመዘኛው ኦየሱስ በምድር እንደተመላለሰ መመላለስ ነው፡፡

በእርሱ እኖራለሁ የሚል እርሱ እንደ ተመላለሰ ራሱ ደግሞ ሊመላለስ ይገባዋል። 1ኛ ዮሐንስ 2፡6

የትምህርት የስብከትና የማንኛውም አገልግሎት ግብ ሰዎች ክርስቶስን እንዲመስሉ ማስቻል ነው፡፡

እኛም በክርስቶስ ፍጹም የሚሆን ሰውን ሁሉ እናቀርብ ዘንድ ሰውን ሁሉ እየገሠጽን ሰውንም ሁሉ በጥበብ ሁሉ እያስተማርን የምንሰብከው እርሱ ነው፤ ቆላስይስ 1፡28

በምድር ላይ ስንኖር ቃሉን በመቀበላችን የሚያልፍብን አስቸጋሪ ነገር ሁሉ አላማው ክርስቶስን አንድንመስል ማስቻል ነው፡፡

ደግሞ እናንተ ቃሉን በብዙ መከራ ከመንፈስ ቅዱስ ደስታ ጋር ተቀብላችሁ፥ እኛንና ጌታን የምትመስሉ ሆናችሁ፤ 1ኛ ተሰሎንቄ 1፡6

በቤተከርስትያን የተሰጡት አምስቱ የአገልግሎት ስጦታዎች አላማ እኛን ወደ ክርስቶስ ሙላት ማድረስ ነው፡፡

ሁላችን የእግዚአብሔርን ልጅ በማመንና በማወቅ ወደሚገኝ አንድነት፥ ሙሉ ሰውም ወደ መሆን፥ የክርስቶስም ሙላቱ ወደሚሆን ወደ ሙላቱ ልክ እስክንደርስ ድረስ፥ ኤፌሶን 4፡12-13

የእውነተኛ አገልጋይ ሸክም ክርስቶስን በሰዎች ልብ መሳል ነው፡፡ የአገልጋይ የመጨረሻው ስኬት ክርስቶስ በልባቸው የተሳሉ ሰዎችን ማፍራት ነው፡፡

ልጆቼ ሆይ፥ ክርስቶስ በእናንተ እስኪሣል ድረስ ዳግመኛ ስለ እናንተ ምጥ ይዞኛል። ገላትያ 4፡19

የአገልጋይ ስኬት መለኪያው ክርስቶስ የተሳለባቸው ፣ ክርስቶስን የሚሸቱና ክርስቶስን የሚመስሉ ሰዎችን ማፍራት ነው፡፡

እናንተም በሕያው እግዚአብሔር መንፈስ እንጂ በቀለም አይደለም፥ ሥጋ በሆነ በልብ ጽላት እንጂ በድንጋይ ጽላት ያልተጻፈ፥ በእኛም የተገለገለ የክርስቶስ መልእክት እንደ ሆናችሁ የተገለጠ ነው። 2ኛ ቆሮንቶስ 3፡3

የአገልጋይ ታላቁ ሃላፊነት በኑሮ ክርስቶስን መስሎ ሌሎች ክርስቶስን አንዲመስሉ ምሳሌ መሆን ነው፡፡

እኔ ክርስቶስን እንደምመስል እኔን ምሰሉ። 1ኛ ቆሮንቶስ 11፡1

በምድር ላይ ኢየሱስን ከመምሰል ጋር የሚጠጋ ምንም ክብር የለም፡፡ ኢየሱስን መምሰል በምድር ላይ ምንም ዋጋ የምንከፍልለት ታላቅ ግብ ነው፡፡

አዎን፥ በእውነት ከሁሉ ይልቅ ስለሚበልጥ ስለ ክርስቶስ ኢየሱስ ስለ ጌታዬ እውቀት ነገር ሁሉ ጉዳት እንዲሆን እቈጥራለሁ፤ ስለ እርሱ ሁሉን ተጐዳሁ፥ ክርስቶስንም አገኝ ዘንድ፥ በክርስቶስም በማመን ያለው ጽድቅ ማለት በእምነት ከእግዚአብሔር ዘንድ ያለው ጽድቅ እንጂ ከሕግ ለእኔ ያለው ጽድቅ ሳይሆንልኝ፥ በእርሱ እገኝ ዘንድ ሁሉን እንደ ጕድፍ እቈጥራለሁ፤ ፊልጵስዩስ 3፡8-9

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#እግዚአብሔር #ጌታ #መከተል #ክርስቶስእስኪሳል #መምሰል #ክርስቶስንመምሰል #ቃል #ተማሪ #መንፈስቅዱስ #ቃሉንመስማት #ደቀመዝሙር #ቤተክርስትያን #አማርኛ #ስብከት #ነፍስንመካድ #መፅሃፍቅዱስ #ተከታይ #ህይወት #ፌስቡክ #አቢይዋቁማ #አቢይዋቁማዲንሳ

ወንድ ልጅ

baby-feet-847824_960_720.jpgሕፃን ተወልዶልናልና፥ ወንድ ልጅም ተሰጥቶናልና፤ አለቅነትም በጫንቃው ላይ ይሆናል፤ ስሙም ድንቅ መካር፥ ኃያል አምላክ፥ የዘላለም አባት፥ የሰላም አለቃ ተብሎ ይጠራል። ኢሳይያስ 9፡6

ኢየሱስ የእግዚአብሄር ድንቅ ስጦታ ነው፡፡ ኢየሱስ ወደ ምድር ሲወለድ ከተገለፀበት ስሞች መካከል አንዱ ይህ ነበር፡፡

ኢየሱስ በምድር ላይ የነበረውን ጨለማ የመግፈፍ ታላቅ ሸክምን በጫንቃው ላይ ተሸክሞ ነበር ወደምድር የመጣው፡፡ ሰው ሁሉ የእግዚአብሄርን አላማ በማይረዳበትና በጠላት የማታለል እስራት ውስጥ በነበረበት ጊዜ ኢየሱስ ብቻ ነበር ለእውነት ሊመሰክልር ወደ ምርድ የመጣው፡፡

ጲላጦስም፦ እንግዲያ ንጉሥ ነህን? አለው። ኢየሱስም መልሶ፦ እኔ ንጉሥ እንደ ሆንሁ አንተ ትላለህ። እኔ ለእውነት ልመሰክር ስለዚህ ተወልጃለሁ ስለዚህም ወደ ዓለም መጥቻለሁ፤ ከእውነት የሆነ ሁሉ ድምፄን ይሰማል አለው። ዮሃንስ 18፡37

በብቸኝነት በምድር ላይ የተገኘውና ሰዎችን ወደ እውነት ለመምራት ሸክምና ሃላፊነትን የወሰደው፡፡ ስለዚህ ነው ኢየሱስ የአለምን ህዝብ ወደ እውነትና ወደ ብርሃን የመምራት ሃላፊነት በጫንቃው ላይ የነበረው፡፡

ደግሞም ኢየሱስ፦ እኔ የዓለም ብርሃን ነኝ፤ የሚከተለኝ የሕይወት ብርሃን ይሆንለታል እንጂ በጨለማ አይመላለስም ብሎ ተናገራቸው። ዮሃንስ 8፡12

ኢየሱስ ከተገለፀባቸው ስሞች ማዕረጎችና መካከል ድንቅ መካር የሚለውም ይገኝበታል፡፡ ኢየሱስ እውነትም መካሪ ነው ያውም ድንቅ መካሪ፡፡ በህይወት በተጨንቅንበት ጊዜ መውጫው በጨነቀን ጊዜ ምን ማድረግ እንደሚገባን ግራ በገባን ጊዜ ምን ማድርግ እንዳለብል መውጫውን የሚያሳየን ኢየሱስ ነው፡፡ መንገዱ በጠፋብን ጊዜ ሁሉ ኢየሱስ መንገድ ነው፡፡ ግራና ቀኙን የማያውቀው ሰው ኢየሱስ ሲገናኘው ምን ማድረግ እንዳለበት ማወቅ ይጀምራል፡፡

ኢየሱስ ከዘላለም በፊት የነበረ የእግዚአብሄር ቃል ነው፡፡ ምንም በምድር የእኛን የሃጢያት እዳ ለመክፈል ሰው ሆኖ ቢመጣም ኢየሱስ ግን ከዘላለም የነበረ ኃያል አምላክ ነው፡፡ በሰው ምክኒያት ሃጢያት ወደ ምድር እንደገባ ሁሉ በሰው ምክኒያት የሃጢያት ሃይል መሻር ሰለነበረበት ኢየሱስ እንደ ሰው በስጋና በደም ተካፈለ እንጂ ኢየሱስ ምድርን የፈጠረ ለአላማው የጨከነ ሃያል አምላክ ነው፡፡ ለማዳን ብርቱ በምንም የማይበገር አለምን ያሸነፈ ሃያል አምላክ ነው፡፡

እውነተኛ አባትነትን ያሳየን ኢየሱስ ነው፡፡ ኢየሱስ እውነተኛ አሳቢ ፣ የሚጠነቀቅልን ፣ መሪያችን ፣ ታጋሽ አባት ነው፡፡ የአባት ትርጉሙ ከጠፋብን ከኢየሱስ ጋር በተገናኘን ጊዜ የአባትን ትርጉም በቅጡ እንረዳለን፡፡ የአባትነት ድርሻና ሃላፊነት ክርክር ቢነሳ ሊፈታው የሚችል አባትነቱን ያስመሰከረ ኢየሱስ ነው፡፡

ኢየሱስ የሰላም አለቃ ነው፡፡ እውነተኛ ሰላምን የፈለገ ሰው ወደ ሌላ መመልከት የለበትም፡፡ የሰላምን ትርጉም ያጣ ሰው እውነተኛ የሰላምን ትርጉም የሚረዳው በኢየሱስ ነው፡፡ ኢየሱስ የሚሰጠው ሰላም አለም እንደሚሰጠው ሰላም አይነት አይደለም፡፡ ኢየሱስ የሚሰጠው ሰላም አእምሮን የሚያልፍ ሰላም ነው፡፡ ኢየሱስ የሚሰጠው ሰላም ከአለም ጩኸትና ትርምስ በላይ የሚሰማ ልብን የሚያሳርፍ ሰላም ነው፡፡

አእምሮንም ሁሉ የሚያልፍ የእግዚአብሔር ሰላም ልባችሁንና አሳባችሁን በክርስቶስ ኢየሱስ ይጠብቃል። ፊልጵስዩስ 4፡7

ሰላምን እተውላችኋለሁ፥ ሰላሜን እሰጣችኋለሁ፤ እኔ የምሰጣችሁ ዓለም እንደሚሰጥ አይደለም። ልባችሁ አይታወክ አይፍራም። ዮሃንስ 14፡27

ሕፃን ተወልዶልናልና፥ ወንድ ልጅም ተሰጥቶናልና፤ አለቅነትም በጫንቃው ላይ ይሆናል፤ ስሙም ድንቅ መካር፥ ኃያል አምላክ፥ የዘላለም አባት፥ የሰላም አለቃ ተብሎ ይጠራል። ኢሳይያስ 9፡6

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ሰላም #ድንቅመካር #ሃያልአምላክ #የሰላምአለቃ #የዘላለምአባት #ኢየሱስ #ክርስቶስ #ጌታ #ቤተክርስትያን #አማርኛ #ስብከት #እምነት #መፅሃፍቅዱስ #መንፈስቅዱስ #አለቅነት #ፌስቡክ #አቢይዋቁማ #አቢይዋቁማዲንሳ

ኢየሱስ ብቻ አይደለም የተወለደው !

angel-shepherds.jpgለብዙ ሰዎች የኢየሱስ መወለድ ከእለታት አንድ ቀን የተፈፀመ ታሪክ ብቻ ነው፡፡ ለእነዚህ ሰዎች የኢየሱስ መሞት በህይወታቸው ያመጣው ምንም ነገር የለም፡፡ በኢየሱስ መወለድ ህይወታቸው አልተለወጠም፡፡ በኢየሱስ መወለድ ህይወታቸው የተወለደ ነገር የለም፡፡

ኢየሱስ በቤተልሄም እንደተወለደ በህይወታችን ሊወለድና ሊኖር ይገባዋል፡፡

ኢየሱስ የተወለደው ታሪክ ሊሰራ አይደለም፡፡ ኢየሱስ የተወለደው ለገድል አይደለም፡፡

ኢየሱስ የተወለደው ለእውነት ሊመሰክር ነው፡፡

እውነትን መፈለግ አቁመናል፡፡ በኢየሱስ እውነትን አግኝተነዋል፡፡

ጲላጦስም፦ እንግዲያ ንጉሥ ነህን? አለው። ኢየሱስም መልሶ፦ እኔ ንጉሥ እንደ ሆንሁ አንተ ትላለህ። እኔ ለእውነት ልመሰክር ስለዚህ ተወልጃለሁ ስለዚህም ወደ ዓለም መጥቻለሁ፤ ዮሃንስ 18፡37

ኢየሱስ የተወለደው ለዓለም ብርሃን ሊሆን ነው፡፡

ዓለም በጨለማ በተያዘበት ጊዜ ወዴት እንደሚሄድ ምን እንደሚያደናቅፈው ባለወቀ ጊዜ ኢያስ በጨለማ የሚያበራ ብርሃን ሆኖ መጣ፡፡

በእኔ የሚያምን ሁሉ በጨለማ እንዳይኖር እኔ ብርሃን ሆኜ ወደ ዓለም መጥቻለሁ። ዮሃንስ 12፡46

ደግሞም ኢየሱስ፦ እኔ የዓለም ብርሃን ነኝ፤ የሚከተለኝ የሕይወት ብርሃን ይሆንለታል እንጂ በጨለማ አይመላለስም ብሎ ተናገራቸው። ዮሃንስ 8፡12

ኢየሱስ የተወለደው በመስቀል ላይ ሊሞት ነው፡፡

ኢየሱስ የተወለደው እኛ ከእግዚአብሄር እንድንወለድ ነው፡፡ ኢየሱስ የተወለደው እኛ ወደ እግዚአብሄር ቤተሰብ ውስጥ አንድንገባ ነው፡፡ ኢየሱስ የተወለደው እኛ የእግዚአብሄር የቤተሰብ አባላት የመሆን ስልጣን እንድናገኝ ነው፡፡

የእርሱ ወደ ሆነው መጣ፥ የገዛ ወገኖቹም አልተቀበሉትም። ለተቀበሉት ሁሉ ግን፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው፤ ዮሃንስ 1፡11-12

ኢየሱስ የተወለደው ከሃጢያት ሊያድነን ነው

ከሃጢያት ካልዳንን ኢየሱስ የተወለደበትን አላማ ስተነዋል ማለት ነው፡፡ ከሃጢያት ሃይል ነፃ ካልወጣን የኢየሱስ መሞት ታሪክ ብቻ ነው ማለት ነው፡፡

ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። ማቴዎስ 1፡21

ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና። ሉቃስ 2፡11

ኢየሱስ የተወለደው ሰላምን ሊሰጠን ነው

በምንም ምድራዊ ሁኔታ የማይለዋወጥ እውነተኛ ሰላም ፣ ምንም ነገር የማያደፈርሰው ሰላም ከሌለን ኢየሱስ የተወለደበትን አላማ ተጠቃሚ አልሆንም ማለት ነው፡፡

ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና። . . . እግዚአብሔርንም እያመሰገኑ፦ክብር ለእግዚአብሔር በአርያም ይሁን ሰላምም በምድር ለሰውም በጎ ፈቃድ አሉ። ሉቃስ 2፡11-14

ሰላምን እተውላችኋለሁ፥ ሰላሜን እሰጣችኋለሁ፤ እኔ የምሰጣችሁ ዓለም እንደሚሰጥ አይደለም። ልባችሁ አይታወክ አይፍራም። ዮሐንስ 14፡27

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ኢየሱስ #ወልድ #ልጅ #አዳኝ #መድሃኒት #ሰላም #ክርስቶስ #ጌታ #ቤተክርስትያን #አማርኛ #ስብከት #ብርሃን #መፅሃፍቅዱስ #መንፈስቅዱስ #መንገድ #ፌስቡክ #አቢይዋቁማ #አቢይዋቁማዲንሳ

ለክብሬም የፈጠርሁት

%e1%8a%ad%e1%89%a5%e1%88%ac-gloryክርስቲያን ሁሉ በህይወትህ የምትፈልገው አንድ ነገር ምንድነው ተብሎ ሲጠየቅ የሚመልሰው “እግዚአብሄርን ማክበር” የሚል ነው፡፡ ምንም እንኳን እግዚአብሄርን ማክበር የሚለው ንገግር ሰፊ ፣ ግልፅ ያልሆነና ተጨማሪ ማብራሪያ የሚያስፈልገው መልስ ቢሆንም ትክክለኛ መልስ ነው፡፡ የተሰራነውና የተፈጠርነው ለእግዚአብሄር ክብር ነው፡፡

በስሜ የተጠራውን ለክብሬም የፈጠርሁትን፥ የሠራሁትንና ያደረግሁትን ሁሉ አምጣ እለዋለሁ። ኢሳይያስ 43፡7

ሁላችንም ልባችን የሚቃጠልለት እግዚአብሄርን የማክበር አላማ ግን ምንድነው ? በህይወታችን የምንፈልገው ምንድነው? እግዚአብሄር ማክበራችንንና አለማክበራችንን እንዴት እናውቃለን? እግዚአብሄርን ማክበራችን እንዴት ይመዘናል? እግዚአብሄርን ማክበራችን እንዴት እናሳካዋለን፡፡ እግዚአብሄርን ማክበር በተግባር ምን ማድረግ ነው? እግዚአብሄርን ማክበራችን እንዴት ይለካል? የሚሉትን ጥያቄዎች መመለስ እግዚአብሄር የማክበር አላማችንን ለማሳካት እጅግ ይጠቅመናል፡፡

ለእግዚአብሄር ክብር መኖር ማለት

  • ለሌሎች መልካምን ማድረግ ነው

በምናደርገው መልካምነት የእግዚአብሄርን መልካምነት ማሳየት ማንፀባረቅ ነው፡፡ ከምድራዊ ሰዎች የእንካ በእንካ አሰራር የተለየ ከእግዚአብሄር ብቻ የሚገኝን በሁኔታዎች ላይ ያልተደገፈ መልካምነት በመኖር ለሰዎች ወደ እግዚአብሄር ማመልከት ነው፡፡ ሰዎች የእኛን ኑሮ አይተው ይህ የሰው ስራ አይደለም ብለው እግዚአብሄርን ራሱን እንዲያመሰግኑት ማድረግ ነው፡፡ ለሁሉም ሰው መልካምነትን በማሳየት የእግዚአብሄርን ታላቅ ችሎታ ማሳየት ነው፡፡

መልካሙን ሥራችሁን አይተው በሰማያት ያለውን አባታችሁን እንዲያከብሩ ብርሃናችሁ እንዲሁ በሰው ፊት ይብራ። ማቴዎስ 5፡16

እናንተ ግን ከጨለማ ወደሚደነቅ ብርሃኑ የጠራችሁን የእርሱን በጎነት እንድትናገሩ የተመረጠ ትውልድ፥ የንጉሥ ካህናት፥ ቅዱስ ሕዝብ፥ ለርስቱ የተለየ ወገን ናችሁ፤ 1ኛ ጴጥሮስ 2፡9

  • የእግዚአብሄርን ስም መሸከም ማለት ነው

የእግዚአብሄር ስም በመልካም ሁሉ እንዲነሳ ሰዎች በእኛ ህይወት የእግዚአብሄርን ፍቅር እንዲያዩ ማድረግ ነው፡፡ በእኛ ምክኒያት የእግዚአብሄር ስም በክፉ አንዳይነሳ መጠንቀቅ ነው፡፡ የእግዚአብሄር ስም ከፍ ብሎ እንዲታይ የሚያስፈልገውን መስዋእትነት ሁሉ መክፈል ነው፡፡ እግዚአብሄርን በሚገባ መወከል ማለት ነው፡፡

ጌታም፦ ይህ በአሕዛብም በነገሥታትም በእስራኤልም ልጆች ፊት ስሜን ይሸከም ዘንድ ለእኔ የተመረጠ ዕቃ ነውና ሂድ፤ ስለ ስሜ ስንት መከራ ሊቀበል እንዲያስፈልገው እኔ አመለክተዋለሁና አለው።ሐዋርያት 20፡15-16

  • ቃሉን በመታዘዝ ፍሬ ማፍራት ነው

ጌታን የምናከብርበትን መመሪያ የእግዚአብሄርን ቃል በመስማትና በመታዘዝ በዚያም ፍሬ በማፍራት ለእግዚአብሄርን ያለንን ፍቅርና አክብሮት ማሳየት ነው፡፡

በእኔ ብትኖሩ ቃሎቼም በእናንተ ቢኖሩ የምትወዱትን ሁሉ ለምኑ ይሆንላችሁማል። ብዙ ፍሬ ብታፈሩና ደቀ መዛሙርቴ ብትሆኑ በዚህ አባቴ ይከበራል። ዮሐንስ 15፡7-8

  • ሃጢያትን መፀየፍ ከክፋት መሸሽ ነው፡፡

እግዚአብሄርን ማክበር ሃጢያትን በመፀየፍና በመሸሽ ቅዱስ የሆነውን እግዚአብሄርን በመምሰል ለቅዱሳን እንደሚገባ መኖር ነው፡፡ እግዚአብሄርን ማክበር ስጋችንን ሃጢያት በመከልከል እግዚአብሄርን ደስ ማሰኘት ነው፡፡

ለቅዱሳን እንደሚገባ ግን ዝሙትና ርኵሰት ሁሉ ወይም መመኘት በእናንተ ዘንድ ከቶ አይሰማ፤ ኤፌሶን 5፥3

ወይስ ሥጋችሁ ከእግዚአብሔር የተቀበላችሁት በእናንተ የሚኖረው የመንፈስ ቅዱስ ቤተ መቅደስ እንደ ሆነ አታውቁምን? በዋጋ ተገዝታችኋልና ለራሳችሁ አይደላችሁም፤ ስለዚህ በሥጋችሁ እግዚአብሔርን አክብሩ። 1ኛ ወደ ቆሮንቶስ 6፡19-20

  • የእግዚአብሄርን ፍላጎት መፈፀም ማለት ነው

ከፍላጎታችን በላይ የእግዚአብሄርን ፍላጎት ማሟላት ፣ የእኛን ፍላጎት ወደጎን በማድረግ የእርሱን ፍላጎት ማስቀደም ነው፡፡ የእግዚአብሄርን ፈቃድ ለማድረግ ራሳችንን መስጠት ማለት ነው፡፡ ከምንም ስሜታችን በላይ እግዚአበሄርን ለማስደሰት ቅድሚያ መስጠት ነው፡፡

ብትፈቅድ ይህችን ጽዋ ከእኔ ውሰድ፤ ነገር ግን የእኔ ፈቃድ አይሁን የአንተ እንጂ እያለ ይጸልይ ነበር። ሉቃስ 22፡42

  • እግዚአብሄርን ብቻ መፍራት ማለት ነው

እንድንፈራቸው የሚፈልጉ በጣም ብዙ ነገሮች ባሉበት አለም ውስጥ እግዚአብሄርን ብቻ መፍራት ፣ እግዚአብሄርን ከሌሎች ጌቶች ጋር አለመቀላቀል ፣ ብቻውን መያዝና በህይወታችን የመጀመሪያውን ስፍራ መስጠት እግዚአብሄርን ከፍ ማድረግ ነው፡፡

ማስፈራራታቸውንም አትፍሩ አትናወጡም፥ ዳሩ ግን ጌታን እርሱም ክርስቶስ በልባችሁ ቀድሱት። 1ኛ የጴጥሮስ መልእክት 3፡14-15

  • እግዚአብሄርን ማመን ማለት ነው

በአካባቢያችን ያሉትን ነገሮች ባለማየት የማይታየውን እግዚአብሄርን በቃሉ ማመንና መታዘዝ ነው፡፡ ይህ በተፈጥሮ አይን የማይታየውን እግዚአብሄር በእኛ እንዲታይና እንዲከበር ያደርገዋል፡፡

እንግዲህ ሁልጊዜ ታምነን፥ በእምነት እንጂ በማየት አንመላለስምና በሥጋ ስናድር ከጌታ ተለይተን በስደት እንዳለን የምናውቅ ከሆንን፥ 2ኛ ቆሮንቶስ 5፡6-7

  • ገንዘብን አለመውደድ ነው

ገንዘብን ሁሉንም ነገር ሊገዛ እንደማይችል በጣም ውስን እንደሆነ መረዳታችን ፣ መኖሪያችን እግዚአብሄር እንጂ ገንዘብ እናዳይደለ ማወቃችን ፣ ከገንዘብ ይልቅ ወደጌታ መጠጋታችንና ገንዘብን መናቃችን እግዚአብሄርን ያከብረዋል፡፡

ለሁለት ጌቶች መገዛት የሚቻለው ማንም የለም፤ ወይም አንዱን ይጠላል ሁለተኛውንም ይወዳል፤ ወይም ወደ አንዱ ይጠጋል ሁለተኛውንም ይንቃል፤ ለእግዚአብሔርና ለገንዘብ መገዛት አትችሉም። ማቴዎስ 6፡24

  • የነፍሳችንን ጥያቄ መርሳት ነው

ነፍሳችን ብዙ ጥያቄ አላት ፡፡ ጥያቄዋን ሁሉ ከሰማንና ከቃሉ በላይ ካከበርናት እግዚአብሄርን አናከብረውም፡፡ እግዚአብሄርን ለማክበር የነፍሳችንን ጥያቄና ጩኸት መርሳት ይጠይቃል፡፡ ከነፍሳችን በላይ ቃሉን መስማትና መታዘዝ እግዚአብሄርን በህይወታችን ያከብረዋል፡፡

የእግዚአብሄርን ነገር አክብዶ ለመያዝ የራስን ነገር ቀለል አድርጎ መያዝ ይጠይቃል፡፡ ለእግዚአብሄር ስራ ቅድሚያ ለመስጠት የነፍሳችንን ጥያቄ አለመስማትና ቸል ማለት ይኖርብናል፡፡

ነፍሱን ሊያድን የሚወድ ሁሉ ያጠፋታልና፤ ስለ እኔ ነፍሱን የሚያጠፋ ሁሉ ግን እርሱ ያድናታል። ሉቃስ 9፡24

ነገር ግን ሩጫዬንና ከጌታ ከኢየሱስ የተቀበልሁትን አገልግሎት እርሱም የእግዚአብሔርን ጸጋ ወንጌልን መመስከር እፈጽም ዘንድ ነፍሴን በእኔ ዘንድ እንደማትከብር እንደ ከንቱ ነገር እቆጥራለሁ። ሐዋርያት 20፥24

ይህን ፅሁፍ ለሌሎች ሼር   share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ክብር #ራእይ #አላማ #ግብ #ውሳኔ #ኢየሱስ #ክርስቶስ #ጌታ #ቤተክርስትያን #አማርኛ #ስብከት #ብርሃን #መፅሃፍቅዱስ #መንፈስቅዱስ #መንገድ #ፌስቡክ #አቢይዋቁማ #አቢይዋቁማዲንሳ

ይህን ያውቁ ኖሯል? የክሪስማስ እውነተኛ ትርጉም

christmasብዙ ሰው ክሪስማስን ሲያስብ እውነተኛ ትርጉሙን በፍፁም አያስበውም፡፡ ለአንዳንዱ የበአል ሰሞን ነው፡፡ ለሌላው አዲስ አመትን የሚቀበልበት የመጨረሻው ወር ነው፡፡ ለሌላው የክሪስማስ ስርአቶች የሚታዩበት ፣ ቤቶችና ሱቆች በክሪስማስ ዛፍ የሚያሸበርቁበት ፣ ቤትና አካባቢው በክሪስማስ መብራቶች የሚሽቆጠቆጥበት ወቅት ነው፡፡ ለሌላው ክሪስማስ የሚበላበትና የሚጠጣበት ከቤተሰብ ጋር የሚገናኙበት የአመቱ መዝናኛ ጊዜ ነው፡፡ እንዲሁ ለሌላው ክሪስማስ ልብስና ቁሳቁስ የሚለወጥበትና በአዲስ የሚተካበት ጊዜ ነው፡፡

ግን ክሪስማስ ይህ ብቻ ነው? ክሪስማስን ስናስብ ይህን ብቻ የምናስብ ከሆነ የክሪስማስን ዋናውን አላማ ስተነዋል፡፡ ክሪስማስ በዚህ ብቻ ካሰብነው ዋና ነገር በህይወታችን ጎድሏል ማለት ነው፡፡

እውነት ነው አለም ክሪስማስን ዋናው የንግድ ጊዜና የአመቱ ዋናው ንግድ ወቅት አድርጋዋለች፡፡ ክሪስማስ ዋናውን መልክቱን ከመሳቱ የተነሳ የክሪስማስ ዋናው ባለቤት አይጠቀስም፡፡

እወነት የክሪስማስ ትርጉሙና አላማው ይህ ነው? እኛ የምናከብረው ክሪስማስና ለልጆቻችን የምናስተላልፈው ክሪስማስ ይህ ነው?

እውነተኛውን የክሪስማስ ትርጉም እንመልከት፡፡

ክሪስማስ የምስራች ነው

ሰው በሃጢያት ምክኒያት ከእግዚአብሄር ክብር ወድቆ በሃዘን በነበረበት ጊዜ የኢየሱስ መወለድ ታላቅ የምስራች ነው፡፡

መልአኩም እንዲህ አላቸው፦ እነሆ፥ ለሕዝቡ ሁሉ የሚሆን ታላቅ ደስታ የምሥራች እነግራችኋለሁና አትፍሩ፤ ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና።  ሉቃስ 2፡10-11

ክሪስማስ  ስለተስፋ ይናገራል

ሰው ሁሉ በሃጢያት ከተስፋ ርቆ በነበረበት ጊዜ ለሰው ልጆች ብርሃን ሊሆን ኢየሱስ ወደምድር የመጣበት ኢየሱስ የተወለደበት በአል ነው፡፡ ክሪስማስ ኢየሱስ በመወለዱ የሰው ልጆች የመዳን ተስፋ እንደገና የለመለመበት ነው፡፡

ልጅም ትወልዳለች፤ እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ። ማቴዎስ 1፡21

ክሪስማስ  ስለደህንነት ያውጃል

ለሃጢያት መድሃኒት የተወለደበት ጊዜ በመሆኑ ክሪስማስ መድሃኒት ነው፡፡

ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና። ሉቃስ 2፡11

ክሪስማስ ፍቅር ነው

ኢየሱስ ወደምድር የተወለደው ለእኛ ነፍሱን አሳልፎ ለመስጠት ነው፡፡

ነፍሱን ስለ ወዳጆቹ ከመስጠት ይልቅ ከዚህ የሚበልጥ ፍቅር ለማንም የለውም። ዮሃንሰ 15፡13

ክሪስማስ ስጦታ ነው

የሰው ልጆች በሃጢያታቸው ምክኒያት ለዘላለም ከእግዚአብሄር እንዳይለያዩ ለሃጢያታቸው እዳ እንዲከፍል እንድያ ልጁን ለአለም በስጦታ የሰጠበት በዓል ነው፡፡

በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና። ዮሐንስ 3፡16

ክሪስማስ የብርሃን ጊዜ ነው

የአለም ብርሃን የሆነው የኢየሱስ መወለድ ለአለም በጨለማ ውስጥ የበራ ብርሃን ነው፡፡

በነቢዩም በኢሳይያስ፦ የዛብሎን ምድርና የንፍታሌም ምድር፥ የባሕር መንገድ፥ በዮርዳኖስ ማዶ፥ የአሕዛብ ገሊላ፤ በጨለማ የተቀመጠው ሕዝብ ታላቅ ብርሃን አየ፥ በሞት አገርና ጥላ ለተቀመጡትም ብርሃን ወጣላቸው የተባለው ይፈጸም ዘንድ ይህ ሆነ። ማቴዎስ 4፡14-16

ክሪስማስ መስዋእትነት ነው

ኢየሱስ በእግዚአብሄር መልክ ሲኖር ሳለ ስለእኛ ሃጢያት ሰው ሆነ፡፡ ኢየሱስ እኛን ከበደል ለማዳን ከሰው ተወለደ፡፡

ነገር ግን የባሪያን መልክ ይዞ በሰውም ምሳሌ ሆኖ ራሱን ባዶ አደረገ፥ በምስሉም እንደ ሰው ተገኝቶ ራሱን አዋረደ፥ ፊልጵስዩስ 2፡7-8

ይህን ፅሁፍ ለሌሎች ሼር  share ማድረግ ቢወዱ

ለተጨማሪ ፅሁፎች https://www.facebook.com/abiy.wakuma/notes

ለቪዲዮ መልእክቶች https://www.youtube.com/user/awordm/videos

#ገና #በዓል #ፍቅር #ተስፋ #ደስታ #መስዋእት #ቤተክርስትያን #አማርኛ #ስብከት #ብርሃን #መፅሃፍቅዱስ #መንፈስቅዱስ #ህይወት #ፌስቡክ #አቢይዋቁማ #አቢይዋቁማዲንሳ  #የዋህነት #ንፁህ

%d bloggers like this: